Аҟәа. Абҵарамза 24, 2022 шықәса. Аԥсныпресс. Агәабзиарахьчара аминистр Едуард Быҭәба Гагра араионтә хәышәтәырҭа Хада аҿы анҭыҵтәи аусуратә еилатәара мҩаԥигеит. Арҭ амшқәа рзы абзиаҟаҵаҩцәа рыцхыраара иабзоураны араҟа ишьақәыргылахеит аультраҩжьытә диасгностика аппарат ҿыц.
Ашәахәатә диагностика аспециалист Валери Травин ишазгәеиҭаз ала, аппарат ҳаамҭа иақәшәоит, араионтә хәышәтәырҭа Хада аҭаххрақәагьы нанагӡоит.
«Афирма Samsung иҭнажьыз аппарат ахаҭабзиара даараӡа иҳаракуп, ахархәара акыр иманшәалоуп. Ари аҩыза аппарат аахәара хра злоу усны иҟалеит Аԥсны азы», - ҳәа инаҵшьны иазгәеиҭеит Валери Травин.
«Аультрабжьытә диагностика аппарат Гагратәи ахәышәтәырҭа ҳамҭас иаиҭеит Саид Лолуа. Уи ахәԥса 2 млн 600 нызықь мааҭ рҟынӡа инаӡоит. Даараӡа иҭабуп ҳәа раҳҳәоит ас еиԥш аҳамҭа ҟазҵаз», - ҳәа иҳәеит Едуард Быҭҽба.
Гагра араионтә хәышәтәырҭа аҳақьым хада лажәақәа рыла, уаанӡа игылаз аиқәыршәага ажәхьан.
«Иҿыцу амаруга агәы-ада ачымазара змоу апациентцәеи абдоминалтә чымазарақәа зыхьуа ауааи рыхәаԥшра азы алшара аԥнаҵоит. Уи даара ицхыраагӡа бзиахоит ҳусура аҿы», – ҳәа иазгәалҭеит аҳақьым хада Индира Арсалиа.
Араионтә хәышәтәырҭа Хада аҿы еиԥырҟьарада афымцамч ала аиқәыршәара апроблема ӡбахеит.
«Мчыбжьқәак раԥхьа Индира Артиом-иԥҳа атрансформатор аахәара аҿы ацхыраара аҭаразы ҳара ҳахь аҳәара ҟалҵеит. Сара, ахәҭакахьала уи азы «Амшынеиқәафымцамч» аиҳабы Зураб Сергеи-иԥа Багаԥшь иахь аҳәара ҟасҵеит. Аамҭа кьаҿ иалагӡаны ажәытә трансформатор аҿыц ала иԥсахын. Иҭабуп имҩаԥгаз аусура азы», - ҳәа иҳәеит Едуард Быҭәба.
