Аԥсны аҭҵаарадыррақәа Ракадемиа апрезидент Заур Џьопуагьы аконференциа алахәылацәа дрыдныҳәалеит. Уи ас еиԥш иҟоу аусмҩаԥгатәқәа рымҩаԥгара иацоу аҵакы ахадара азгәеиҭеит, аконференциа алахәылацәа зегьы ақәҿиарақәа рзеиӷьаишьеит.

Адныҳәаларатә ажәахәқәа рыҟаҵара ашьҭахь, Нестор Лакоба изку адокументалтә фильм дырбан.

Аҭоурыхтә наукақәа ркандидат, апрофессор, Аԥсны Аҭҵаарадыррақәа Ркадемиа иатәу  Д.И.Гәлиа ихьӡ зху Аԥсуаҭҵааратә Институт аҭоурых аҟәша анаукатә усзуҩ  Станислав Лакоба  ажәахә: «Аԥсны агуманитартә ҭҵаарақәа аҿиара асакьаҳәымҭа, «археологиатә» ашәҟәеимдара, арепрессиақәеи аимҵәареи (1922 - 1931 шш.)» ҟаиҵеит;

Афилософиатә наукақәа ркандидат, адоцент, Асоциал-економикатә ҭҵаарақәа Рцентр анапхгаҩы Олег Дамениа ажәахә «Изаҳҭахузеи ҳара амилаҭтә ҭоурых? (аԥсуа ҭоурых аҵаки ахадареи рзы ахәыцрақәа)» ҟаиҵеит.

«Даҽазнык Нарҭтәи аепос аԥҵара аамҭеи уи аԥҵаҩцәеи рзы» - аҭоурыхдырратә наукақәа рдоктор, апрофесор, Аԥсны Аҭҵаарадыррақәа Ракадемиа  академик Олег Бӷажәба.

Зынӡа аконференциа апрограмма аҿы иҟоуп Аԥснытәи анаукатә еилазаара аусура  еиуеиԥшым аетапқәеи аспектқәеи ирызку азҵаарақәа жәпакы ирызку 14 анаукатә ажәахәқәа.