Аҟәа. Абҵарамза 21, 2022 шықәса. Аԥсныпресс. Иахьа иазгәарҭоит Адунеизегьтәи ателехәаԥшра Амшныҳәа (World Television Day). Ари аныҳәа аԥҵан ԥхынҷкәынмза 17, 1996 шықәса рзы Еиду Амилаҭқәа Реиҿкаара (ООН) Ассамблеиа Хада ала.
Аԥсны ареспублика зегьы аҟны адырраҭарақәа алазырҵәо ателехәаԥшратә еилазаарақәа ҩба ыҟоуп. Уи – абҵарамза 6, 1978 шықәсазы иаԥҵаз Аԥснытәи аҳәынҭқарратә телерадҳио Еилахәыреи рашәарамза 26, 2007 шықәса рзы раԥхьаӡа аефир ахь ицәырҵыз «Абаза-ТВ» роуп. Иара убас Аԥсны аус руеит иҭыԥырку ателестудиақәа – «Гәдоуҭа-ТВ», «Гал –ТВ».
«Гәдоуҭа-ТВ» адиректор Лариса Ҷанба Аԥсныпресс акорреспондент диҿцәажәо напхгара зылҭо ателестудиа аиҳарак араион аҿы имҩаԥысуа ажәабжь ҿыцқәа аланарҵәоит ҳәа иазгәалҭеит.
«Ҳара 2012 шықәса инаркны Гәдоуҭа араион аҿы имҩаԥысуа ахҭысқәа рзы адыррақәа ауааԥсыра ирылаҳарҵәоит. Аефир ахь ҳара ҳцәырҵуеит мчыбжьык ахь ҩынтә: амҽыша, ашәахьазы аиҭарбара ҳамоуп. Аштат ала ҳара ҳтелестудиа аҿы 14-ҩык аус руеит», – ҳәа илҳәеит лара.
«Гал-ТВ» аредактор Анжела Убилаа убасҵәҟьа иазгәалҭеит ртелестудиа аиҳарак ала Гал араион ажәабжь ҿыцқәа рзы адырра шыҟанаҵо.
«Аха иазгәаҭатәуп, зны-зынлагьы ҳара Очамчыреи Ҭҟәарчали араионқәа рахь ааԥхьара анҳаулак ҳанцогьы шыҟало, уахьынтәи нас арепортажқәа ҟаҳҵоит. Ҳара мҽышала, мчыбжьык иалагӡаны иҟало ажәабжьқәа рыхҳәаа ала аефир ахь ҳцәырҵуеит, ашәахьала аиҭарбара ҳамоуп. Аштат ала ҳтелестудиа аҿы аус руеит 16-ҩык», - ҳәа еиҭалҳәеит лара.
Аинформациатә агентра «Аԥсныпресс» аредакциа Адунеизегьтәи ателехәаԥшра Амшныҳәа инамаданы рколлегацәа ателехәаԥшра аусзуҩцәа ирыдныҳәалоит, ирзеиӷьаршоит арҿиаратә қәҿиарақәа, ажәабжь бзиақәа, аманшәалара.
