Амузыкантцәа Аҟәа ауааԥсыреи ақалақь асацәеи ҩ-сааҭк ирҭагӡаз амузыкатә гәырԥсаҳәара ҳамҭас ирырҭеит. Аконцерт апрограмма аҿы инагӡахеит аклассикатә џьазтә стандартқәа Диук Еллингтон ирҿиамҭа   «Caravan»,  Гордон Гудвин ирҿиамҭа «The jazz police» еиԥш, еиуеиԥшым аамҭақәа рзы иаԥҵаз асоветтә фильмқәеи еицырдыруа аҳәаанырцәтәи ахитқәа рҟынтәи аџьазтә усдулара змоу акомпозициақәагьы. Еиҳарак иззыԥшымыз акакәны иҟалеит аколлектив ала ажәытә аурыс ашәа «Эх, дубинушка, ухнем» анагӡара.

Аҭәразы акгьы згымыз  Афилармониа азал аҿы иҟаз апублика даара ибзианы амузыканцәа рыдыркылеит, уи моу, аномерқәа рыбжьара еиԥш урҭ рынагӡараангьы акыр аамҭа рнапы еинырҟьон. Акомпозициақәа зегьы рҿы амузыканцәа рҽеиҭныԥсахло  асоло нарыгӡон. Убри аан урҭ аӡәаӡәала еиԥш ианеицынарыгӡозгьы ыҟан. Убри иабзоураны ахәаԥшцәа биг-бенд – ари  асолистцәа мацара рыла ишьақәгылоу аоркестр акушәа анырра роуан. 

Иҟоуп итәаны мацара ари ақәгыларақәа рыхәаԥшра амыцхәрас, гәыԥ-гәыԥла рҽеидкыланы акәашара иалагоз ахәаԥшцәагьы.  Раԥхьа иналар-ааларшәны, иԥхашьа-ԥхаҵошәа, аха нас, аиҳарак Л.Гаидаи икомедиа «Бриллиантовая рука» аҟынтәи ашәақәа рырҳәара ианалага урҭ аритм рҽақәыршәаны ашәаҳәареи акәашареи иалагеит.

Аҟәатәи аџьаз абзиабацәа авиртуозцәа ркоманда рҟазара акыр аамҭа ирхамышҭуа, ргәы иҭымҵәо иҟалашт.

Аконцерт «Урыстәылеи Аԥсни реимадаратә культуратә усмҩаԥгатәқәа» ҳәа апроект аҳәаақәа ирҭагӡаны имҩаԥысит. Апроект Урыстәылатәи Афедерациеи Аԥсны Аҳәынҭқарреи акультура аусхкы ала ирыбжьоу аимабзиаратә еизыҟазаашьақәа рырӷәӷәареи рыҿиареи  иазырхоуп. Аусмҩаԥгатәқәа рымҩаԥгара адгылара арҭоит Урыстәылеи Аԥсни ркультура Аминистррақәа.