Аҟәа. Абҵарамза 7, 2022 шықәса. Аԥсныпресс. Аԥсны аиустициа Аминистрра аҟны иҟоу аӡбаратә експертизақәа рзы Ареспубликатә аҭҵаара-дырратә Институт адиректор Гьаргь Амҷба, имаҵуратә ҭаара аҳәаақәа ирҭагӡаны, Урыстәылатәи Афедерациа аиустициа Аминистрра аҟны иҟоу Афедералтә Биуџьеттә Усбарҭа аӡбаратә експертиза азы Воронежтәи Ацентр анапхгараҭара дырԥылеит, ҳәа адырра ҟанаҵоит Аԥсны аиустициа Аминистрра апресс-маҵзура.
Аиԥылара аҿы ирылацәажәеит Аԥсны аиустициа Аминистрра аҟны иҟоу аӡбаратә експертизақәа рзы Ареспубликатә аҭҵаара-дырратә Институти Урыстәылатәи Афедерациа аиустициа Аминистрра аҟны иҟоу Афедералтә Биуџьеттә Усбарҭа аӡбаратә експертиза азы Воронежтәи Ацентри рыбжьара аусеицуреи аимадареи рыбжьаҵара иадҳәалоу азҵаарақәа жәпакы. Аӡбаратә експертиза азы Воронежтәи Ацентр анапхгаҩы Алеқсандр Долин Аԥснытәи рколлегацәа иҿыцу атехникатәии акомпиутертәии атехнологиақәа рырдырра, иара убас аметодикатә цхырагӡатәқәа рыла аиқәыршәареи рганахьала ацхыраара рыҭара ишазхиоу иҳәеит.
«Воронежтәи Ацентри Аԥсны аӡбаратә експертизақәа рзы Ацентри рыбжьара ишьақәыргылаз аиқәшаҳаҭрақәа ҳазҭоу ашықәс нҵәаанӡа инагӡахароуп. Аамҭа кьаҿ иалагӡаны Аԥсны аиустициа Аминистрра аҟны иҟоу аӡбаратә експертизақәа рзы Ареспубликатә аҭҵаара-дырратә Институт аусзуҩцәа ргәыԥ аԥышәарҳара азы Воронежҟа идәықәҵахоит», - ҳәа адырра ҟаиҵеит Гьаргь Амҷба.
