Аҟәа. Абҵарамза 5, 2022 шықәса. Аԥсныпресс. Гәдоуҭа араион аҩныҵҟатәи аусқәа рыҟәша аусеилыргаанӡатәи аусбарҭа, абҵарамза 1 азы Гәдоуҭа араион Бармышь ақыҭан иҟалаз амҩатә машәыртә хҭыс инамаданы аусеилыргаанӡатәи агәаҭарақәа мҩаԥнагоит, ҳәа адырра ҟанаҵоит Аԥсны аҩныҵҟатәи аусқәа Рминистрра аофициалтә саит.
Заанаҵтәи адыррақәа рыла, амикроавтобус «Mercedes-Benz 210D» (аҳәынҭқарратә номертә дырга К210ХК) аԥсҟы зкыз, 1991 шықәса рзы ииз Ашәба Аслан Андрон-иԥа, амашьына арныҟәцара азы аршаҳаҭга имаӡамкәа амашьына аԥсҟы икын. Уи Гагра ақалақь аҟынтәи Аҟәаҟа ихы рханы дшаауаз, 14:00 сааҭ инарзынаԥшуа, ареспубликатә мҩаду «Ԥсоу-Егры» 50-тәи акилометр аҿы адырга инеиужьу ацәаҳәа дахысны иаԥхьа инеиуаз, убри аамҭазы Оҭҳара ақыҭа аганахьала аихаҵәира иаҿыз автомашьына «Nissan» даахеит. Иҟалаз амашьынақәа реиҿасра иахҟьаны амашьынарныҟәцаҩ Аслан Ашәба, амашьына изнымкылакәа амҩа аҿықә ахь даршәит, анаҩс уи ажра иҭаҳаит. Иҟалаз амҩатә машәыртә хҭыс иахҟьаны ҩыџьа апассаџьырцәа еиуеиԥшым ахәахәа-чахәарақәа рыманы Гәдоуҭатәи ахәышәтәырҭахь инаган. Урҭ иахәҭоу раԥхьатәи амедицинатә цхыраара анрыҭаха ашьҭахь доусы рыҩныҟақәа рахь иоужьҭын.
Иарбоу амҩатә машәыртә хҭыс иалахәыз амашьынарныҟәцаҩцәа амедицинатә гәаҭара азы Ареспубликатә наркодиспансер ахь идәықәҵахеит, аха арныҟәцаҩцәа руаӡәы иарбоу апроцедура ахысра мап ацәикит.
Абҵарамза 3, 2022 шықәсазы Гәдоуҭатәи араионтә ӡбарҭа иаднакылаз аӡбамҭа инақәыршәаны, амашьынарныҟәцаҩ Ашәба А. А. Аԥсны Административтә зинеилагарақәа рзы Азакәанеидкыла ахәҭаҷ 123 ахәҭа 1 (Арҩшьра азы амедицинатә гәаҭара азы амилициа аусзуҩ автомашьына арныҟәцаҩ иахь иҟаиҵаз азакәантә дҵа анагӡара мап ацәкра) инақәыршәаны административтә зинеилагара аҿы ахара идҵоуп ҳәа дыԥхьаӡахеит. Аслан Ашәба ахьырхәра аҳасабала изалхуп 15-мши-ҵхи аҭакра.
