Аҟәа. Абҵарамза 4, 2022 шықәса. Аԥсныпресс. Ихыркәшахеит XVI арра-спорттә хәмаррақәа «Аиааира», ҳәа иаанацҳауеит аҵарадырреи абызшәатә политикеи Рминистрра апресс-маҵзура.
Аицлабрақәа рхы аладырхәит жәаҩы-жәаҩыла еилаз аа-командак. Ахәмаррақәа реихшьаалақәа рыла актәи аҭыԥ ааннакылеит Аҟәа ақалақь акоманда, аҩбатәи аҭыԥ - Гагра араион акоманда, ахԥатәи аҭыԥ - Ҭҟәарчал араион акоманда.
Аҵареи абызшәатә политикеи рминистр Инал Габлиа ахәмаррақәа ирылахәыз дрыдныҳәалеит, ахраҿақәеи аҳаҭыртә шәҟәқәеи амедалқәеи ранеишьеит, иара убас ашьапылампылтә, анапылампылтә, амҵәышәмпылтә мпылқәа ҳамҭас ириҭеит.
Аицлабрақәа мҩаԥысуан К. Дзидзариа ихьӡ зху Аԥснытәи аҳәынҭқарратә лицеи – интернат аҿы. Убри аан адгылара ҟанаҵеит атәылахьчара Аминистрра.
