Аҟәа. Абҵарамза 1, 2022 шықәса. Аԥсныпресс. Аԥсны аԥыза-министр ихаҭыԥуаҩ Сергеи Пустовалов ахықәкытә программа «Анхарҭаҭыԥ– 2022» азы анапхгарабжьаратәи анагӡара-напхгараҭатә комиссиа ҳазҭоу ашықәс азы аихшьаалатә усуратә еилатәара мҩаԥигеит.
2022 шықәсазы ахықәкытә Программа «Анхарҭаҭыԥ – 2022» аҳәаақәа ирҭагӡаны анхарҭа аахәара азы аҳәынҭқарра аҟынтәи афинанстә цхыраара аиуразы ауааԥсыра рҟынтәи иалагалаз 94 зыҳәамҭа иахәаԥшит.
Иааизакны уахәаԥшуазар, 2022 шықәсазы ақәшаҳаҭра аиуит 51 зыҳәамҭа:
I агәыԥ иаҵанакуа аинвалидцәа, 1992-1993шш. Аԥсны жәлар рџьынџьтәылатәи еибашьра I агәыԥ иаҵанакуа аинвалидцәагьы уахь иналаҵаны. – 14 зыҳәамҭа;
Ахәыҷы ныҟәгатәыс дызмоу ахаҿқәа:
– аинвалид, мамзаргьы даныхәыҷыз инаркны аинвалидра змоу –19 зыҳәамҭа;
Ахәыҷырацәа змоу аҭаацәа, ҭаацәак аҿы 5-ҩык, ма еиҳаны ахәыҷқәа ахьыҟоу – 15 зыҳәамҭа;
Иҭахаз иҭаацәа – 2 зыҳәамҭак;
Аиаҭымцәа – 1 зыҳәамҭак.
Акомиссиа иаднакылаз аӡбамҭа ала, 32-ҩык азыҳәамҭақәа алазҵаз Апрограмма апунктқәа 3.3.1; .3.3.2; 3.18 инарықәыршәаны, ахықәкытә программа «Анхарҭаҭыԥ» алахәхара азы ашәҟәҭагалараҿы мап рыцәкын.
11-ҩык азыҳәамҭа алазҵаз рзы иназыцҵоу агәааҭара рзаԥҵоуп.
2022 шықәсазы асертификат роуит, анхарҭаҭыԥгьы аархәеит 23-ҩык азыҳәамҭақәа алазҵаз, урҭ ироуз афинанстә цхыраара азеиԥш еицҵалыҵ 19,8 млн. мааҭ рҟынӡа инаӡоит.
