1992 ш. ԥхынгәымза 23 - Аԥсны Аҳәынҭқарра аҭоурых ҿыц аҟны аҵак ду змоу рыцхәны иԥхьаӡоуп. Убри аҽны Владислав Арӡынба зхдараҟны дыҟаз Аԥсны Аҳәынтқарра Иреиҳаӡоу Асовет ишьақәнаргәгәеит Аҳәынҭқарратә бираҟи Аԥсны Аҳәынҭқарратә герби.

Ари аӡбамҭа ҳҳәынҭқарра ашьақәыргылараҟны акырӡа зҵазкуаз аамҭан. Убри алагьы иалыршан Аԥсуа жәлар жәытә-натә аахыс иззықәԥоз амилаҭтә хақәиҭреи ахьыԥшымреи, шәышықәсалатәи рҭоурыхи, амилаҭтә хаҿреи символс ирымаз ашьақәырӷәӷәара.

́Аҳәынҭқарратә бираҟ авторс дамоуп абаҩхтәра злаз асахьаҭыхҩы Валери Гамгьиа. Уи иаԥиҵаз абираҟ шьаҭас иамоуп Аԥсны ижәытәӡатәу аҳәынҭқарратә символқәа. Абираҟ аҟны иарбоу  ихадароу аелемент - Аԥсуа аҳра аҭоурыхтә бираҟқәа ирну иаарту анапсаргәыҵа, - символра азнауеит аҭынчра, аартра, агәылараеимабзиара, быжь-иаҵәак – ихадоу ҳтәыла аҭоурыхтә ҳаблақәа ирсимволуп.

Иахьа Аԥсны Аҳәынҭқарратә бираҟ еиднакылоит Аԥсны Аҳәынҭқарра иқәынхо атәылауаа зегьы. Уи иаҳгәаланаршәоит ҳажәлар знысыз имариамыз аҭоурыхтә мҩа, аиааиреи ахьыԥшымреи ирыхҭнаҳҵаз, ҳаԥсадгьыл аизҳазыӷьаразы лыҵшәабзиала аусура ҳгәы азҭанаҵоит. Аԥсны Аҳәынҭқарра иахашәыршәыруа аԥсуа бираҟ ҳара зегьы иаҳгәадуроуп - ҳакзаара,  ҳсуверенитет  иасимволуп

Агәра згоит, Аԥсны Аҳәынҭқарратә бираҟ жәларбжьаратәи аиҿкаарақәа зегьы рҟны ишӡыргахо, ҳҳәынҭқарра ахьыԥшымра азхазҵо атәылақәа рхыԥхьаӡара ишрыцло. Ари ҳара ҳзеиԥш хықәкы ауп,  ахақәиҭреи, ахьыԥшымреи рыхьчаразы,  аиашара ашьақәыргылара рзы иҳалшо зегьы ҟаҳҵоит, ҳаԥсадгьыли еиз  хауа абиԥареи аԥеиԥш лаша рымазарц азы.

Гәык-ԥсык ала ишәзеиӷьасшьоит агәабзиара, агәамч, аихьӡарақәа. Аԥны Аҳәынҭқарратә  бираҟ еснагь ҳакзаара иахаҿразааит, ҳалшареи ҳгәыӷрақәеи ирдыргазааит, аихьӡара ҿыцқәа рахь ҳнвнагалартә аҭагылазаашьа амазааит!

Ишәыдысныҳәалоит Аԥсны Аҳәынҭқарратә бираҟ амш!»