Аилак ахантәаҩы Ердешан Кобаш-Бганба инапы зҵаиҩыз аҳәамҭаҿы инаҵшьны иазгәаҭоуп шықәсырацәалатәи Аԥсны аиҟәыҭхара, аԥсуа тәылауаҩшәҟәқәа разхамҵара, ишиашоу атранспорттә еимадара аҟамзаара,  аԥсҭазаареи, агәабзиара ахьчареи, аҵареи, изааигәоуи иареи реимадареи рзы ауаҩы изинқәа шеиланаго. Иҟоу аԥкрақәа ирыхҟьаны еиҩшоу адиаспора рҭаацәарақәа шықәсыла изеидгылом, ичмазаҩу  аҳәаанырцә ианаамҭоу амедицинатә цхыраара иоуртә еиԥш аҭагылазаашьа имам.

Ааԥхьара авторцәа иаадырԥшуеит Ҭырқәтәылатәи Ареспублика адәныҟатәи аполитикаҿы иубартә иҟоу аиҿагыларақәа, иргәаладыршәоит Анкара агуманитартәи акоммерциатәи хықәкқәа рзы аӡбамҭақәа ишазыхиоу.

Аҭоурыхтә еилибамкаара ҵаулақәа шыҟоугьы Ҭырқәтәылеи Ермантәылеи рыбжьара ишиашоу аҳаиреимадара аартуп. Ҭырқәтәыла Таивань официалла ишазханамҵоугьы аграждантә авиациатә еимадара бжьоуп. Ҭырқәтәыла иазханаҵеит Косово ахатәҳәаақәҵаразы азин.

 Аҩадатәи Кипри Ҭырқәтәылатәи Ареспубликеи атәылауаҩшәҟәқәеи атранспорттә еимадареи рхархәаразы амеханизм ҷыдақәа аус рыдулоуп.

«Анкареи Ермантәылеи ишиашоу аимадарақәа рыбжьаҵара алшазар, аҭоурыхтәи аҭаацәаратәи еимадарақәеи рыла Ҭырқәтәыла иадҳәалоу аԥсуа жәлар рганахьала иҟоу аԥкрақәа еиҿагылароуп», — ҳәа азгәаҭоуп атекст аҿы. 

Аԥсны адгылара азҭо Кавказтәи аилакы ирыланаҳәеит зымҽхак ҭбаау аграждантә аԥшьгара адгылара шанаҭо, ааԥхьара ҟарҵеит адиаспора ахаҭарнакцәеи, иара убас згәы былуа атәылауааи рахь, Ҭырқәтәыла адәныҟатәи аусқәа рминистррахь аофициалтә ааԥхьара нарышьҭырц Аҳәынҭқарра акоммуникациақәа рсистема CIMER ала. 

«Аԥсуа тәылауаҩшәҟәқәа разхаҵареи Аԥсни Ҭырқәтәылеи ишиашоу аимадара рыжьаҵареи ҳара ҳзин ауп!» - ҳәа ражәа хдыркәшоит ааԥхьара авторцәа.