Асасцәа бзиала шәаабеит ҳәа раҳәо Бадра Гәынба иазгәеиҭеит атеатр маҷ актиорцәа рыдкылара иара изы ҳаҭыр дууны ишыҟоу.
«Даара угәы иахәартә иҟоуп Урыстәыла Аҳәынҭқарратә академиатә театр маҷ иахьа Аԥсны иахьыҟоу. Ари ҳаҭыр ду зқәырҵо аҭоурыхи атрадициа беиеи змоу коллективуп. Насгьы, ҳәарада, ара акультуреи аҟазареи русзуҩцәа дуқәа аус ахьыруа коллективуп.
 
Ҳара иаадыруеит сынтәатәи ашықәс атеатр маҷ азы ииубилеитәны ишыҟоу. Даара ҳгәы иахәоит аиубилеитә шықәсазы агастрольқәа рахь шәахьаҳзааз», – иҳәеит Ахада. 
Иара асасцәа иҭабуп ҳәа реиҳәеит аԥсуа хәаԥшыҩцәа еицырдыруа аспектакльқәа рбаразы алшара ахьрырҭаз азы.  
Аҳәынҭқарра Ахада ас еиԥш иҟоу апроектқәа ирыбзоураны Урыстәылеи Аԥсни ркультуратә еизыҟазаашьақәа шыӷәӷәахо азы агәрагара ааирԥшит.