Иахьа имҩаԥысит арежиссиори атеатр актиорцәеи раԥхьатәи реиԥылара, уаҟа Габриа дазааҭгылеит аспектакль аконцепциа. Арежиссиор игәҭакы инақәыршәаны ақәыргыламҭа иаҳнарбоит есыҽнытәи аԥсҭазаареи иаабац ақалақьуаҩ дызқәымгәыӷкәа дзықәшәо аҭагылазаашьақәеи.
Аспектакль иалахәуп жәҩык актиорцәа. Арежиссиор иазгәеиҭеит, ари раԥхьатәи реибадырра шакәу, иара дшақәгәыӷуа акраамҭатәи арҿиаратә усеицура.
«Сара ари аԥшьгара даара исгәаԥхеит, гәахәара дула исыдыскылеит. Исҭахуп акомедиа ҿыцла, аинтерес аҵаны аҟаҵара алсыршарц».
Роман Габриа - Урыстәылатәи театртә режиссиоруп. 2019 шықәса раахыс Санкт-Петербургтәи атеатр аҿы Григори Козлов «Иҟазарҭа» аҟны арежиссиор хада имаҵура имоуп.
