Фазиль Искандер изы ргәалашәарақәа еиҭарҳәеит алитературадырҩы, аессеист, Урыстәылатәи Афедерациа ауаажәларратәии аҳәынҭқарратәии аусзуҩ, Москва ашәҟәыҩҩцәа Реидгыла ахантәаҩы, Урыстәыла зҽаԥсазтәыз аусзуҩ Евгений Сидоров, Алитературатә Институт аҿы искандертәи асеминар азыӡырҩы, апоет, ашәҟәыҩҩбы, Аԥсны анаукақәа Ракадемиа ҳаҭыр зқәу адоктор Денис Чачхалиа.
Амемориалтә кабинет аӡыргара аҳәаақәа ирҭагӡаны имҩаԥысит Франциа уажәааигәа иҭыхыз афильм «Море» дырбара. Уи асиужет ашьаҭа иалагалан Фазиль Искандер заатәи иажәабжь «О море». Уи зеиӷьаҟам ала инаигӡахьан Авангард Леонтиев. Афильм автор Елена Сурина (Франциа).
Еицырдыруа алитературатә критик, ажурнал «Знамя»аредактор хада ихаҭыԥуаҩ Наталиа Иванова лыхьӡала дықәгылеит Москватәи аҳәынҭқарратә Университет афилологиатә факультет алитература атеориа акафедра аспирантка Мариа Кирова. Мариа Кирова, Фазиль Искандер аепоха аҳәаақәеи аԥсуа, мамзаргьы аурыс литературатә традициақәа рҳәаақәа рҭагӡара ҟалаӡом, избан акәзар Аԥсны азышәаҳәаҩ иҟыбаҩ убри аҟара идууп, ганрацәалагьы ишьақәгылоуп, ҳәа инаҵшьны иазгәалҭеит. Аусмҩаԥгатә аҿы иара убас дықәгылеит урыстәылатәи ауаажәларратәи аҳәынҭқарратәи аусзуҩ Сергеи Николаи-иԥа Красавченко. Ахәҭакахьала уи Фазиль Искандер иуаажәларатә ажәа ҷыдала дазааҭгылеит. Иара убас Фазиль Искандер Москва ақалақь, Жәларбжьаратәи Ауниверситет ахь ааԥхьара зауз асасцәеи астудентцәеи арҵаҩцәеи рҿаԥхьа дықәгылауа дзыԥхьаз алекциа «Совесть» ацыԥҵәаха даԥхьеит.
Ахәылԥаз асасцәа рхыԥхьаӡараҿы дыҟан иара убас Фазиль Искандер иповест «Детство Чика» амотивқәа рыла иҭыхыз афильм ҿыц автор, арежиссиор Аслан Галазов. Аамҭа кьаҿ иалагӡаны Фазиль Искандер ихьӡ зху Акультуратә Центр ари афильм арбара азԥхьагәанаҭоит.
Ақәгыларақәа зегьы рышьҭахь, Фазиль Искандер иԥшәмаԥҳәыс, апоетесса Антонина Хлебникова-Искандер ааигәа илыԥшааз Фазиль анҵарҭа шәҟәы ианиҵахьаз инҵамҭақәак дрыԥхьеит. Аҵыхәтәан лара Амемориалтә кабинет аиқәыршәаҩцәеи аиҿкааҩцәеи Фазиль Искандер иҩызцәеи аколлегацәеи, иара убас ахәылԥаз аҿы иқәгылаз зегьы ииаадырԥшыз ахшыҩзышьҭреи Фазиль Искандер ирҿиара ахь аиҷаҳареи рзы иҭабуп ҳәа ралҳәеит.
