Аԥсны Аҵара аминистрра ахьӡала, хаҭала сара сыхьӡала гәык-ԥсыкала ишәыдысныҳәалоит ашколтә ԥсҭазаара ахыркәшара!
Жәеиза шықәса инеиԥынкыланы, џьабаала аԥынгылақәа шәыриааиуа, ԥхьаҟа адыррақәа рышҟа амҩа шәықәын. Ари имариамыз амҩа анысраҿы ишәарӷьажәҩаны ишәывагылан шәырҵаҩцәа, шәҭаацәа. Урҭ шәара ишәықәгәыӷуан, рдырралеи рԥышәалеи ишәыцхраауан, агәрагьыргон ауадаҩрақәа шәыриааины ԥхьаҟа шәышцоз.
Шәара – шә́ара ззымдырӡо, зыламыс зыԥсырҭоу ажәлар ирхылҵыз, аҭоурых ҵаулеи акультура ҳараки змоу ҳаԥсадгьыл Аԥсны аҿаршәоуп.
Шәаԥхьа иаартуп аҵара лашарахь, адырраҵаулақәа рахь амҩақәа. Шәацәымшәан ашьаҿеихгара, шәырцәымшәан ауадаҩрақәа,шәыжәлари шәыԥсадгьыли ирыхәаша амҩа шәананыло.
Ишәымазааит агәабзиара ӷәӷәа! Ишәыгымхааит аҩызцәа иашақәа! Ишәԥеиԥшзааит аартра дуқәа, аихьӡарақәа! Ашкол аҿы ишәырҳаз адыррақәа шьаҭас иҟалааит шәаԥхьаҟатәи шәеихьӡарақәа рҿы!
Мҩамш, акыр иаԥсоу ҳаушьҭымҭацәа! Шәаԥхьа ишьҭоу аԥышәарақәа рҿы – ақәҿиарақәа! Шәеихьӡарақәеи шәыӡбахә бзиеи ргәышьҭнахлааит шәзааӡаз шәҭаацәа, ишәылаҽхәалааит ишәзааԥсаз шәырҵаҩцәа, шәыԥсадгьыл Аԥсны!
Ҳаҭырла, Аԥсны Аҵара аминистр Гәынба Х. В.
