Аиԥылара иалахәын апартиа «Амцахара» ахантәаҩы Алықьса Цыгәба, Аԥсны Аџьынџьтәылатә еибашьра аветеранцәа руаажәларратә еиҿкаара анапхгаҩы Ҭемыр Гәлиа, апартиа «Жәлар ракзаара афорум» ахантәаҩы Аслан Барцыц, апартиа «Аиҭаира» ахантәаҩы ихаҭыԥуаҩ Иулиан Бобуа.

Атәыла ахада инаҵшьны иазгәеиҭеит зегьы еиуеиԥшым агәаанагарақәа рымазар шалшо, аха ажәлари аҳәынҭқарреи рзы ихадоу азҵаарақәа рҿы аидгылара шаҭаху.

«Ҳара жәларык ҳауп, ҩнык ауп иҳамоу. Уи Ҳаԥсадгьыл Аԥсны ауп», - иҳәеит Бадра Гәынба.

Аҳәынҭқарра Ахада иазгәеиҭеит Аԥсны Жәлар Рџьынџьтәылатә еибашьра аветеранцәа рроль, инаҵшьны иҳәеит аибашьра аамҭазы ажәлар аҳәынҭқарра ахьчаразы ишеидгылаз еиԥш иахьагьы атәыла аҿиаразы аидгылара шаҭаху.

Аиԥылара алахәылацәа ргәаанагара еиқәшәеит Аԥсны ашәарҭадара алзыршо, атәыла ганрацәала ацхыраара азҭо Урыстәыла иааннакыло аҭыԥ иадҳәалоу азҵаараҿы.

Ахада ихаҭыԥуаҩ Беслан Бигәаа иазгәеиҭеит ас еиԥш ахеилакқәа раԥҵара аполитикатә мчрақәа реидкылареи наҟ-ааҟтәи адиалог арӷәӷәареи ишацхраауа, уи атәыла аҭышәынтәалареи аҿиареи рзы акырӡа шаҵанакуа.

Аҳәынҭқарра Ахада инаҵшьны иазгәеиҭеит Аконсультативтә хеилак шаарту атәылазы акрызҵазкуа азҵаарақәа рылацәажәара иазыхиоу аполитикатә мчрақәа зегьы рзы.

Аполитикатә партиақәа рхадацәа Аконсультативтә хеилак аԥҵара аидеиа иадгылеит. Дара ргәаанагарала аилак аусура атәыла аҿиареи, аизҳазыӷьареи, ауаажәларра реидкылараеи иацхраауеит.