Ауаажәларраҿы ауаҩы иааникыло аҭыԥ, уи ироль, Аԥсны аҭоурых иадҳәалоу аинтерес зҵоу асиужетқәа, адоуҳатә мчы ду змоу иԥшьоу асимволқәа рыла иҭәу акосмостә хаҿсахьақәа, амилаҭтә хдырра, атрадициақәа рыгәцаракра, иара убри аамҭазгьы аҿыханҵатә ҟазараҿы аҿыцрақәа ралагалара зныԥшуа асахьаҭыхҩы, аскульптор, Аԥсны зҽаԥсазтәыз акультура аусзуҩ Нугзар Ҷыҷыкәа-иԥа Логәуа идунеи ҷыдоуп. Ирҿиара ԥшшәы рацәала еилоуп. Сынтәа мшаԥымза 20 рзы 70 шықәса зхыҵыз аҟаза иусумҭақәа ргалераҿы иалкаау аҭыԥ  ааннакылоит афилософиатә ҵакы змоу адипломтә усумҭа «Алагамҭа». Уи ихьчеит 1988 шықәсазы Қарҭтәи асахьаҭыхратә академиаҿы иҵара анхиркәшоз, иара уатәи афонд аҿы ауп иахьа уажәраанӡагьы иахьыҵәаху.

Еиуеиԥшым аамҭақәа рзы Нугзар Логәуа акультура аминистрс дыҟан, Аԥсны асахьаҭыхыҩцәа Реидгыла данапхгаҩын, 2021 шықәса раахыс иара акультуреи аҭҵаарадырреи рзы Ахада иабжьгаҩыс дыҟоуп, илахьынҵаҿы иҷыдоу аҭыԥ ааннакылоит арҵаҩратә усура. Уи џьашьатәӡам, избанзар иқыҭа гәакьаҿы, Ҷлоутәи абжьаратә школ аҟны  аҵәаӷәанҵареи асахьаҭыхреи дирҵон. Акультура Аҩнаҿы иаԥиҵаз асахьаркыратә студиа шықәсык ашьҭахь ахәыҷтәы сахьаркыратә школ ахь ииаган. Аррамаҵура дахысаанӡа, Қарҭтәи асахьаҭыхратә академиа дҭалаанӡа аҵара ахьиҵоз Аҟәатәи асахьаркыратә ҵараиурҭаҿы жәашықәса инарзынаԥшуа аҿыханҵа дирҵон. Арҵаҩратә усуразы  агәазыҳәара асахьаҭыхҩы ииҭазар ҟалап ақыҭа школ аҿы агеографиеи алитературеи рурокқәа мҩаԥызгоз иаб Ҷыҷыкәа Нестор-иԥа. Раԥхьаӡа анышәаԥшь аус адулара иҽаназишәа,  атекстқәа рзы асахьақәа ҭихуа даналага адгылара изҭаз иаб иоуп.

Иахьатәи аамҭазы Нугзар Логәуа – Аԥснытәи аҳәынҭқарратә университет аҟны аҟазара афакультет аҿы ддекануп, ддоцентуп,  уаҟа акыр шықәса инеиԥынкыланы дрыԥхьоит анаҩстәи амаҭәарқәа: асахьаҭыхра, аҿыханҵа, акомпозициа.

Асахьаҭыхҩы Нугзар Логәуа иқыҭа гәакьаҿы ипроект ала идыргылеит 1992-1993 шш. Аԥсны жәлар Рџьынџьтәылатә еибашьраҿы иҭахаз рбаҟа. Иара давторуп аскульптуратә композициа «Аиааира згаз», Тҟәарчал ақалақь аҿы иҭахаз ирызку амемориалтә комплекс апроект данапхгаҩуп. Тамшь ақыҭан игылоу абаҟа «Ахақәиҭра ан» апроект авторцәа дыруаӡәкуп.

Аибашьра аамҭа хьанҭа аан асахьаҭыхҩы еиҿикааит (Аԥсны аҳәынҭқарра арратә комиссариат аҟны), асахьаркыра-политикатә артель «Ажәеиԥшьаа», амацәаз иҭакыз Тҟәарчалҟа агуманитартә цхыраара назгоз дреиуан.