Аҳәынҭқарра азакәан хада аиқәыршәараҿы, атәылауаа рзинқәеи рхақәиҭреи рыхьчараҿы, аҳәынҭқарра азинеиҿкаара арӷәӷәараҿы апрокуратура ихадоу ароль нанагӡоит. Азакәан ақәныҟәареи, уи аҿаԥхьа зегьы реиҟарареи рзы аҭакԥхықәра ду адуп.
Аԥсны аҳәынҭқарра апрокуратура аусбарҭақәа ртрадициақәа ирызгәдууп. Еиуеиԥшым ашықәсқәа рзы урҭ русбарҭақәа рҿы аус руан ззанааҭдырра ҳаракыз, апринципра злаз, зус гәыкала иазыҟаз азиндырыҩцәа, аҳәынҭқарратә усзуҩцәа. Иахьа аусзуҩцәа рабиԥара ҿа арҭ атрадициақәа ирыцырҵоит, рус ҭакԥхықәрала иазнеиуеит, рмаҵзуратә уалԥшьа анагӡара аҩаӡара шыҳараку аадырԥшуеит.
Шәара шәусура ауаажәларра аҳәынҭқарратә институтқәа рыгәра ахьынӡаргоу иадҳәалоуп.
Ари амш аҽны иҭабуп ҳәа шәасҳәоит шәџьабааи, шәзанааҭдырра ҳараки рзы.
Ишәзеиӷьасшьоит агәабзиара, аманшәалара, амаҵзураҿы ақәҿиара ҿыцқәа. Шәара шәусура аринахысгьы Аԥсны аҳәынҭқарра азакәани, аиашареи, аизҳазыӷьареи рырӷәӷәара иазкхааит!
Ишәыдысныҳәалоит!»
