Аԥсны аганахьала аиқәшаҳаҭра инапы аҵаиҩит аекономика аминистр Ҭеимураз Амқәаб, абанк аганахьала — ПСБ ахантәаҩы ихаҭыԥуаҩ Михаил Дорофеев.
Аиқәшаҳаҭра асоциалтә ҵакы амоуп, афинанстә хырхарҭақәа рҿы аинырра арҭбаареи иааиԥмырҟьаӡакәа Аԥсны инхо Урыстәыла атәылауаа рымаҵ аура ахаҭабзиара аизырҳареи ирзырхоуп. Аетап ҿыц иацнаҵоит уаанӡа ихацыркыз аусеицура.
Ԥхынгәымза 10, 2025 шықәсазы Бадра Гәынбеи Сергеи Кириенкои Аҟәа иҟоу ПСБ ахаҭарнакра иаҭааит, уаҟа Аԥсны инхо урыстәылатәи атәанчаҩцәа рзы абанктә хсаалагақәа рыла реиқәыршәара иалацәажәеит. Ас еиԥш ахсаалагақәа атәылаҿы ирырҭоит 2025 шықәса мшаԥымза 18 инаркны. Иахьазы урыстәылатәи атәанчаҩцәа рҟынтәи 21 нызқьҩык инареиҳаны Урыстәыла Асоциалтә фонд аҟынтәи атәанчахәқәеи асоциалтә шәарақәеи ахьҭарҵо ахсаалагақәа роухьеит.
«Ҵыԥх Владимир Владимир-иԥа иахь аҳәара ҟасҵеит ҳтәанчаҩцәа абри аҩыза алшара рырҭарц азы. Аҭагылазаашьа схы иархәаны имҩаԥыргаз аус ду азы иҭабуп ҳәа сҳәар сҭахын», — иҳәеит Бадра Гәынба.
«Зегьы ирыцкуп ауаа рзы иманшәалоу аҭагылазаашьақәа раԥҵара, аиҳаракгьы урҭ рықәра ыҟазар», — ҳәа инаҵшьны иазгәеиҭеит Сергеи Кириенко.
Афинанстә инфраструктура аҿиареи абанктә маҵзурақәа рымҽхак арҭбаареи атәылауаа рсоциалтә хьчара аҩаӡара шьҭнахуеит, Аԥсни Урыстәылеи рыбжьара аекономикатә еинырра арӷәӷәара иацхраауеит.
