Ари амш азы ҩ-рыцхәк еиқәшәеит – Аԥсны раԥхьатәи Ахада Владислав Арӡынба иԥсҭазаара иалҵра амши, аҩбатәи ахада Сергеи Багаԥшь иира амши.

«Иаҳҳәар ҳалшоит, аҭоурых ахаҭа арҭ ахьӡқәа џьарак еиднакылеит, иналукааша аҳҳәынҭқарратә усзуҩцәа Аԥсны алахьынҵа аӡбараҿы ирымоу ароль арҵабыргырц аҭахызшәа.

Владислав Арӡынба ихьӡ иадҳәалоуп иахьатәи аԥсуа ҳәынҭқарра ашьақәгылареи, Аԥсны Аџьынџьтәылатә еибашьраҿы Аиааира агареи.

Сергеи Багаԥшь ари аҭоурыхтә хырхарҭа иациҵеит. Иара инапхгара ашықәсқәа раан Аԥсны аҳәынҭқарратә институтқәа рӷәӷәан, уи аамҭаз иҟалеит акрызҵазкуаз аҭоурыхтә хҭыс — Урыстәылатәи Афедерациа Аԥсны ахьыԥшымра азханаҵеит.

Арҭ арыцхәқәа реиқәшәара ҳажәлар ирыдыркылоит ҩ-епохак реимадара иасимволны. Ари иаҳгәаланаршәоит ҳажәлар рымаҵ ауразы зхы иамеигӡаз ауаа рымчала ишышьақәгылаз ихьыԥшым Аԥсны Аҳәынҭқарра.

Владислав Арӡынбеи Сергеи Багаԥшьи ргәалашәара еиҵагыло абиԥарақәа еиднакылоит, Аԥсны аҭоурых адаҟьақәа рҿы ихадароу акакәны иаанхоит», – ҳәа аҳәоит, хәажәкырамза 4 рзы, Аҳәынҭқарра Ахада Бадра Гәынба иҟаиҵаз аҳәамҭаҿы.