Аҟәа. Жьҭаарамза 21, 2022 шықәса. Аԥсныпресс. Аԥыза-министр Алеқсандр Анқәаб Аҟәа ақалақь аҿы иҟоу Нестор Лакоба имемориалтә музеи аиҭашьақәыргылара иазку апроект анагӡара иалаху архитектура-ргыларатәи еиҿкаарақәеи аиқәыршәаратә еилазареи рхаҭарнакцәа алархәны аусуратә еилатәара мҩаԥигеит, ҳәа иаанацҳауеит аминистрцәа Реилазаара аофициалтә саит.
«Аԥсныргылара» адиректор Хада Руслан Тәанбеи аилазаара «Интерпроект» ахаҭарнакцәеи атәыла аԥыза-министр амузеи ахыбреи уи аекспозициатә хәҭеи лаԥшылатәи апроекти имҩаԥысуа аргылара-монтажтә усурақәеи рзы адырра ирҭеит.
Ишазгәаҭаз ала, апроект азеиԥшргыларатә хәҭа ҳазҭоу ашықәс нҵәаанӡа ихыркәшазароуп, 2023 шықәса инаркны аилазаара «Интерпроект» аинтериери амузеитә експозициеи реиҿкаарахьы ииасуеит. Уи Нестор Лакоба иҩны-амузеи анапхраҭара ақәыршаҳаҭра нагӡазароуп.
Алеқсандр Анқәаб аилацәажәара иалахәыз ари акыр зҵазкуа апроект анагӡара ахаҭабзиара аҳаракра алзыршо адеталқәа зегьы ҷыдала ахшыҩзышьҭра арҭарц иҳәеит. Амузеи аиҭашьақәыргылара иадҳәалоу азҵаарақәа зегьы Аҳәынҭқарра Ахада Аслан Бжьаниа хаҭала ахылаԥшра аиҭоит.
