Лара Ҭырқәтәыла инхо аԥсуа диаспореи рҭоурыхтә ԥсадгьыли реимадара арӷәӷәара хымԥадатәиуп ҳәа инаҵшьны иазгәалҭеит. 

«Гәахәара дууп ҳара ҳзы, акыргьы аҵанакуеит Шәара аԥсуа культуратә центрқәа Рфедерациа анапхгаҩы иаҳасабала шәусура Аԥсныҟа аусуратә визитла иахьхацшәыркыз», – ҳәа илҳәеит Гәыли Кьчба.

Иауз Аҭрышба аиԥыларазы иҭабуп иҳәеит, уи Аԥсны иара аҩызцәа рацәаны ишимоу, иара аусеицура аҳәаақәа рырҭбааразы агәҭакқәа шимоу иазгәеиҭеит.

1992–1993 шш. Аԥсны жәлар Рџьынџьтәылатәи еибашьра иалахәыз Иауз Аҭрышба аибашьраҿы ицәҭахаз иҩызцәа игәалаиршәеит.

«30 шықәса реиҳа ҵит, аха иахьа уажәраанӡа аибашьра алацәажәареи иҭахаз ҳҩызцәеи ҳашьцәеи ргәалашәареи уадаҩуп», – ҳәа иҳәеит иара.

Иауз Аҭрышба аԥсуаа еиуеиԥшым жәларбжьаратәи аплошьадкақәа рҿы Рыԥсадгьыли рхи аардырԥшыртә еиԥш ирацәаны алшара рымоуп ҳәа иԥхьаӡоит. Аҿырԥшы ҳасабла иара иааигеит ҳџьынџьуаҩ Ельчин Аӡынба Женева лықәгылара.

«Ҳара инагӡаны иаҳзеилымкаауазаргьы ҟалоит иҳамоу алшарақәа ахьынӡанаӡо атәы. Ҳара зегьы ари азҵаара акәша - мыкәша ҳааидгыланы Аԥсны аинтересқәа зехьынџьара аӡыргара ҳҽазаҳшәозароуп», – ҳәа иҳәеит Иауз Аҭрышба.

Ауаажәларратә палата амаӡаныҟәгаҩ лхаҭыԥуаҩ Сократ Џьынџьал иганахьала аибашьраҿы иҭахаз аибашьцәа баша иҭамхаӡеит ҳәа инаҵшьны иазгәеиҭеит.

«Дара аԥсуа жәлари Рыԥсадгьыли еиқәдырхеит, урҭ ҳара ҳзы ԥсра рықәӡам», – ҳәа иҳәеит иара.

Сократ Џьынџьал аҳәынҭқарра аҿиараҿы ицәырҵуа ауадаҩрақәагьы дырзааҭгылеит. «Ҳара аибашьраҿы аиааира ҳгар, иаарласны аҭынч ԥсҭазаара аиқәыршәара ҳалшоит ҳәа ҳгәы иаанагон. Аха уи акырӡа иуадаҩхеит. Азхаҵара акыр шықәса азықәԥара аҭаххеит.

Ҳара ҳгәы иаанагон ҳхьыԥшымра жәларбжьаратәи азхаҵара ашьҭахь еиҳа аԥсҭазаара мариахоит ҳәа, аха уи ашьҭахьгьы астратегиатә партниорс иҳамоу Урыстәыла азыҟазаашьақәа рыргылара аганахьала ирацәаны аусура цәырҵит.  Ауадаҩрақәа шмаҷмызгьы, ҳара ԥхьаҟатәи аԥеиԥш лаша ҳақәгәыӷуеит, Урыстәылатәи Афедерациа уи аҿы акыр иҳацхраауеит», - ҳәа иҳәеит Сократ Џьынџьал

Иара Аԥсны Актәи Ахада Владислав Арӡынба иажәақәа ааигеит: «Ҳара ҳадгьыл ҳахьчеит, Егрынӡа ҳнаӡеит, аха изаҳҭахузеи ҳара аиааира, араҟа аԥсуаа нымхар, ҳрацәаҩны ҳҟамлар?»

Сократ Џьынџьал еиликаауеит, Ҭырқәтәыла инхо аԥсуа диаспора зегьы кажьны Аԥсныҟа нхараҳәа ахынҳәра шырцәыуадаҩхо, аха иара  игәаанагарала аҭаацәа рҿы ҩыџьа аԥацәа ыҟазар, руаӡәы Аԥсныҟа даар ауеит.

Ауаажәларратә Палата алахәыла, Аԥсны ажурналистцәа Реидгыла ахантәаҩы Руслан Ҳашыг еиҭеҳәеит аиҿкаарақәа зегьы рҿы аулафахәы афонд аҟынтәи 2% арепатриациа Афонд ахь ишахыԥхьаӡалахо. Иара игәаанагарала аҳәаанырцә инхо ҳџьынџьуаагьы ари афонд ахь џьара шәатәқәак ахырыԥхьаӡалара цәгьамызт. 

Руслан Ҳашыг иара убас адырра ҟаиҵеит Аԥснытәи аҳәынҭқарратә Университет аҿы арепатриантцәа иреиуоу астудент заҵәык дшыҟоу.  Астудентцәа радыԥхьалара – ари аџьынџьуаа рырхынҳәаразы иреиӷьу мҩоуп. Ари адгьыл аԥсуаа ықәынхалароуп», – ҳәа инаҵшьны иазгәеиҭеит Руслан  Ҳашыг.

Ҭырқәтәыла иҟоу азинмчы змоу Аԥсны ахаҭарнак Ибраҳим Аҩӡба убасҵәҟьа иазгәеиҭеит адискуссиақәа рҟынтәи конкретла ауснагӡатәқәа рахь аиасра шхымԥадатәиу.

Ибраҳим Аҩӡба иажәақәа рыла, Ҭырқәтәылеи егьырҭ аҳәаанырцәтәи атәылақәеи рҿы иқәынхо аԥсуаа жәларбжьаратәи аплошьадкақәа рҿы Аԥсны аӡыргаразы еиуеиԥшым алшарақәа рымоуп, даргьы уи аҟаҵара иазхиоуп.

Иара Ауаажәларратә палата алахәылацәа ажәа риҭеит, аԥсуа культуратә центрқәа Рфедерациа анапхгаҩы ҿыци Ҭырқәтәыла иҟоу Аԥсны Ахаҭарнакреи адиаспореи аҭоурыхтә ԥсадгьыли реимадара арӷәӷәареи Аԥсны жәларбжьаратәи аплошьадкақәа рҿы аӡыргареи рзы ирылшо зегьы шыҟарҵало.