Лаҵарамза 1, 2025 шықәса инаркны аҳаирбаӷәаза ала ииасыз апассаџьырцәа рхыԥхьаӡара 120 нызықьҩык рҟынӡ инаӡоит, уи аҳаиремадара апопулиарра аизҳара шыҟоу арҵабыргуеит. Атуризм арҿиара аҿы хра злоу усны иҟалеит иҿыцу ахырхарҭақәа раартра – Москваҟа, Санкт-Петербурҟа, Нижни Новгородҟа, иара убас Ханты-Мансискҟа.
Атуристцәа рхыԥхьаӡара ацлара аҿы ҷыдала ароль нанагӡеит аамҭак ала еиуеиԥшым ахырхарҭақәа рыла - Нижни Новгород, Санкт-Петербурги Ханты-Мансиски рзы аԥыррақәа асубсидиа аҭара апрограмма. Уи апассаџьырцәа раара аҭышәынтәалара алнаршеит.
Бадра Гәынбеи Сергеи Кириенкои иара убас аҭоурыхтә терминал иахәаԥшит. Араҟа ареконструкциа мҩаԥысуеит. Аусурақәа зегьы анхыркәшахалак ашьҭахь аҳаирбаӷәаза аушьҭратә лшара сааҭк ахь 400-ҩык апассаџьырцәа рҟынӡа инаӡоит.
