Урыстәылатәи аполициа ахаҭарнакцәа Аԥсныҟа иааит азинхьчаратә усура апрофильтә хырхарҭақәа рыла аусеицура аҳәаақәа рырҭбаара хықәкыс иҟаҵаны.

Аусуратә ҭаара аҳәаақәа ирҭагӡаны аԥснытәии урыстәылатәи аколлегацәа изакәанымкәа анаркотикатәи арҩышьыгатәи маҭәашьарқәа реикәыршара, аекономикатә хырхарҭа змоу ацәгьоурақәа рҿагылара, ҳаамҭазтәи акриминалтә методикақәеи заанаҵтәи аусеилыргара аусбарҭақәа русуреи иадҳәалоу актуалра злоу азҵаарақәа жәпакы ирылацәадәараны иҟоуп.

Роберт Кьиут иарбоу азҵаарақәа ганрацәала анализ азура аусеицра аеффективра ашьҭыхреи ҳаамҭазтәи ауадаҩрақәа рыӡбара алзыршо апрактикатә ӡбамҭақәа рышьақәыргылареи алнаршоит ҳәа инаҵшьны иазгәеиҭеит.

«Ҳара аекономикатә цәгьоурақәа иадҳәалоу аусураҿы ауадаҩрақәа ҳамоуп, ахәҭакахьала абанктә ииагарақәа рганахьала. Ҳара иаҳҭахуп активла аусуразы алшара ҳамазарц», - ҳәа игәазыҳәара атәы иҳәеит Роберт Кьиут.

Аиԥылара рхы аладырхәит аҩныҵҟатәи аусқәа рминистр актәи ихаҭыԥуаҩ Руслан Ажьиба, аминистр ихаҭыԥуаҩ инапынҵақәа назыгӡо, аусеилыргаратә усбарҭа анапхгаҩы Елеонора Карагозиан, Аԥсны иҟоу Урыстәыла аҩныҵҟатәи аусқәа Рминистрра ахаҭарнак Сергеи Голенков, Аԥсны аҩныҵҟатәи аусқәа Рминистрра апрофильтә усбарҭақәа рнапхгаҩцәа.