Аексперттә хеилак аилазаара иалалеит: Урыстәылеи Аԥсни Жәлар рартистка Хьыбла Гьерзмаа, Ареспублика Аԥсны Зҽаԥсазтәыз артист Алеқсандр Шьоуа, Урыстәыла Аҳәынҭқарратә Дума адепутат Оҭари Аршба, Ареспублика Аԥсны ақыҭанхамҩа аминистр Беслан Џьапуа, Аԥсны Ахада Иусбарҭа агуманитартә политика аусбарҭа анапхгаҩы Викториа Бебиа, Аԥсны аус зуа урыстәылатәи аиҿкаарақәа рнапхгаҩцәа.
Ахеилак аӡбамҭала аиааира ргеит 32 аконкурс алахәылацәа. Урҭ рыпроектқәа ихьыԥшым аекспертиза амҩаԥгараан зегьы иреиҳау ахәшьара роуит. Иарбоу аԥшьгарақәа агәабзиара ахьчара, аҭаацәара адгылара рыҭара, акультура, аҭоурыхтә гәалашәареи аҭыԥантәи атрадициақәеи реиқәырхара, иуадаҩу аԥсҭазааратә ҭагылазаашьа зауз ауаа ацхыраара рыҭара, аволонтиорреи агәыҳалалреи рыҿиара адгылара аҭара, уҳәа реиԥш иҟоу ауаажәларра рыԥсҭазаара иузаҟәымҭхо иадҳәалоу аусхкқәа амҽханакуеит.
Иаагозар, аекспертцәа иҳараку ахәшьара арҭеит апроект «Итрадициатәу мшынла аныҟәареи аӷбаргылареи рыклуб» («Клуб традиционного судостроения и мореплавания»). Уи анагӡаразы иазоужьхоит 5 млн. мааҭ рҟынӡа инаӡо агрант. Икоммерциатәым аилахәылара «АЗЕГ» акоманда аҭауад Қьалышьбеи ифлагмантә аԥраӷба. аибашьыгатә аԥсуа агалерақәа (ажәҩа рацәа змоу анышьа дуқәа) реиҭарҿиара мҩаԥнагоит, иара убас амшынтә клуб арҿиара алнаршоит. Аклуб ахь инеир рылшоит изҭаху зегьы, урҭ амшын ус аҭоурых атәы зҳәо аматериалқәа лабҿаба ирбар ауеит. Аԥраӷба Аҟәа ақалақь амшынбаӷәаза асҟьала аҟынтәи аӡы ихҵахоит. Ашколхәыҷқәа зыԥсы ҭоу аҭоурых аурокқәа ирҭаалар рылшоит, изҭаху зегьы – ақаԥданцәеи амшынуааи азыҟаҵаратә ӷба аҿы разыҟаҵарақәеи иаарту алекциақәеи ирҭаар ауеит.
5 млн. мааҭ иаиуеит апроект «Зынаӡара мариоу аԥсы атәыла – Ареспублика Аԥсны иахьаҵанакуа згәабзиара алшарақәа ԥку ауаа рзы аинклиузиатә азҩыдатәратә плиажтә комплекс» («Доступная страна души – инклюзивный оздоровительный пляжный комплекс для людей с ОВЗ на территории Республики Абхазия»). Уи адгалара мҩаԥнагеит аинклиузивтә туризм Ассоциациа. Акоманда ареспублика аҿы зеиҭаҵра алшарақәа ԥкуи даҽакада згәабзиара ԥкуи атәылауаа рзы зегьы рыла иманшәаланы еиқәыршәахо аинклиузивтә плиажтә комплексқәа ҟарҵалоит. Аплиажқәа рҿы иҟалоит ҷыдала еиқәыршәахо ақәиарҭақәеи аӡахьы албаарҭақәеи. Аҭааҩцәа ирыцхраалоит аволонтирцәа.
Акультуратә фонд «Аԥсны-Русь» апроект «Амобилтә планетари – ақыҭашколхәыҷқәа рзы» («Мобильный планетарий – сельским школьникам») анагӡаразы 1 млн. мааҭ инарзынаԥшуа иаиуеит. Акоманда аҭыԥантәи ашколқәа рҿы астрономиа, абиологиа, аҭоурых, агеографиа, уҳәа егьырҭ амаҭәарқәеи анаукатә дисциплинақәеи рзы аҵаратә фильмқәа дырбара мҩаԥнагоит.
Аиааира згаз апроектқәа рынагӡара иалагар алшоит ԥхынҷкәынмза 1 наркны.
Аконкурс агрантқәа рфонд иааизакны 115 миллион. мааҭ рҟынӡа инаӡеит. Раԥхьаӡа акәны ас еиԥш зеицҵалыҵ дуу аԥаратә хархәагақәа аконкурс ашьаҭала Ареспублика Аԥсны аҭыԥантәи ауаажәларратә аԥшьгарақәа рынагӡаразы зныкала иазоужьхоит. Уи алыршахеит Урыстәыла Ахада иҟны иҟоу агранқәа рфонд адгылара иабзоураны. Акорнкурс аоператор ҳасабла иқәгылеит асоциалтә технологиақәа Рцентр «Гарант». Аконкурс ахь азыҳәамҭақәа ралаҵара аамҭазы ацентр акоманда Ареспублика араионқәа зегьы рҿы алахәылацәа рзы имҩаԥнагон латәаралатәи асеминарқәеи аиндивидуалтә консультациақәеи.
