Аусмҩаԥгатә еиҿкаахеит Еиду Амилаҭқәа Реиҿкаара Афатә-ажәтәи ақыҭанхамҩеи реиҿкаара Аҟәа иҟоу апроекттә офис (ФАО) ала.

Ари амш азы акультура-усуратә платформа «Гәыма» аҿы иаадыртит аетнографиатә цәыргақәҵа. Иара убраҵҟьа ахьа аԥсныжәлар рзы иамоу аҵакы атәы зҳәо адокументалтә фильм арбара еиҿкаахоит.

Аныҳәа аҳәаақәа ирҭагӡаны иаадыртуеит афермертә аалыҵқәа рыла ахәаахәҭратә цәыргақәҵа маҷ. Араҟа Еиду Амилаҭқәа Реиҿкаара Афатә-ажәтәи ақыҭанхамҩеи реиҿкаара Аҟәа иҟоу апроекттә офис (ФАО) апроект алахәылацәа ацхеи ашьхааӡара аалыҵқәеи аҭыԥантәи аҵиаақәеи аиҭаҳатәқәеи аиаҵәареи рӡыргаразы алшара рзаԥҵахеит.

Изҭаху зегьы рзы имҩаԥгахоит еицырдыруа ашеф-хәыҟаҵаҩ Шамиль Кылыч иҟынтәи аҟазара-шоу.  Араҟа ицәыргахоит ахьа иалху ҳаамҭа иақәшәо инагӡоу автортә чысхкқәа.

Аԥсны Анаукақәа Ракадемиа аекологиа Аинститут аетномологиа алабораториа аиҳабы  Михаил Қриа, ацәыргақәҵа аартуа, аматериалқәа зегьы еиқәыршәахеит Еиду Амилаҭқәа Реиҿкаара Афатә-ажәтәи ақыҭанхамҩеи реиҿкаара Аҟәа иҟоу апроекттә офиси аԥснытәи аҵарауаҩ, атәылаҿацәҭҵааҩы, арккаҩы Таисиа Аланиеи (1950–2025шш.) русеицура иалҵшәаны ҳәа иазгәеиҭеит.  Уи иажәақәа рыла, аекспозициеи акинорбареи уи лгәалашәареи ахьа иадҳәалоу акультуратә ҭынха ахьчареи иазкхеит.

«Ҳара даара ҳаигәырӷьоит шьҭа традицианы ишьақәгыло иалагаз иахьатәи ҳусмҩаԥгатә аҿы шәбара. Ари шьҭа аԥшьбатәи есышықәсатәи ахьа Амш ауп. Раԥхьаӡа акәны уи ҳара иазгәаҳҭеит Аԥснытәи амузеи аҿы. Ари ацәыргақәҵа азы аматериалқәа рӷьырак еиқәлыршәеит Таисиа Аланиа. Рыцҳарас иҟалаз, лара иахьа дҳалагылаӡам, лыԥсҭазаара далҵит. Ҳара ари аусмҩаԥгатә лара лџьабаа дууи лгәалашәара лашеи ҳаҭырла иазаҳкыр ҳҭахуп», – ҳәа иҳәеит иара.

Михаил Қриа ахьа Аԥсны адагьы Кавказ зегьы азы ихадоу акультура аҳасабала иаҵоу аҵакы ахадара инаҵшьны азгәеиҭеит.