Лықәгылараҿы Мактина Џьынџьалԥҳа аибашьра зхызгаз, уи атәы здыруа Аԥсны азы аиҿагыларақәа рзонақәа рҟынтәи ахәыҷқәа ацхыраара рыҭара атема абстракттә ҵакы шамам, уи иҵаулоу ахатәы ҟазшьа шамоу инаҵшьны иазгәалҭеит.

«Ареспублика Аԥсны аҭынчра иаҵанакуа атәы рдыруеит. Аибашьра ахҟьаԥҟьақәа – ари аҭоурых анаҩс, иахьатәи амш иқәнаргыло ауадаҩрақәагьы ирыдҳәалоуп. Убри азы ауп ҳара ахәыҷқәа рыхьчара амиссиа абиурократиатә ҭакԥхықәра аҳасабала ҳзамыхәаԥшуа, аморалтә уалԥшьаны изҳадаҳкыло», - ҳәа иазгәалҭеит лара.

Ахәыҷтәы аомбудсмен инарҭбааны далацәажәеит Аԥсны агуманитартә цхыраара аганахьала иҟоу аԥышәа.  Аҿырԥштәы ҳасабла лара нанҳәамза 6 рзы Курсктәи аобласт аҿы иҟалаз атрагедиатә хҭысқәа ирыхҟьаны ааха зауз ацхыраара рыҭаразы оперативла еиҿкааз, анаҩс имҩаԥгаз аԥаратә хархәагақәа реизгара далацәажәеит. Аԥшьгара нагӡан Акультура-гәыҳалалратә фонд «Ашана» ала. Убри аан уи адгылара арҭеит ахәыҷқәа рзинқәа рыхьчаразы Азинмчы змоу Иаппарати Аԥсны Иҷыдоу аҭагылазаашьақәа рзы Аминистрреи.

Мактина Џьынџьалԥҳа азҩыдатәра апрограмма далацәажәеит. Уи аҳәаақәа ирҭагӡаны, ҳазҭоу ашықәс аԥхыни ҭагалани рзы Урыстәыла Курсктәии Белгородтәи аобластқәа рҟынтәи ахәыҷы рацәа змоу аҭаацәа рҟынтәи 100-ҩык инарзынаԥшуа ахәыҷқәа Аԥсны апансионат «Аиҭар» аҿы рыԥсы ршьеит.  

«Ахәыҷқәа рзинқәа рыхьчаразы Азинмчы змоу Иаппарат Ареспублика Аԥсны ахылаԥшра аҵаҟа иахьыҟоу ҳасаб азуны, сара иааиуа ашықәс азы аиҿагыларақәа ахьымҩаԥсуа аҭыԥқәа рҟынтәи ахәыҷқәа аԥсшьаразы Аԥсныҟа ааԥҵхьара рыҭаразы аԥшьгара ҟасҵараны сыҟоуп», - ҳәа илҳәеит аомбудсмен.

Лықәгылара хыркәшо Мактина Џьынџьлԥҳа амедицинатә, апсихологиатә, асоциалтә, уҳәа ацхыраара злоу комплексла аус азнеира иаҵоу аҵакы ахадара азгәалҭеит. Лара агуманитартә программақәа рынагӡара аҳәаақәа ирҭагӡаны Аԥсны аринахысгьы аусеицура, аԥышәемадареи ареабилитациатә проектқәа реиҿкаареи ишазхьоу лырҵабыргит.