Аиԥылара иалахәын акультура аминистр ихаҭыԥуаҩ Смыр Динареи Фазиль Искандер ихьӡ зху Аҳәынҭқарратә аурыс драматә театр  адиректор хада Иракли Хынҭәбеи.

«Азин сышәҭозар, бзиала шәаабеит ҳәа шәасҳәарц сҭахуп! Ҳара ҳзы гәахәара дууп Аԥсны шә-театр агастрольқәа ахьымҩаԥысуа. Иацтәи амоноспектакль аншлагла имҩаԥысит, азал зегьы ҭәны. Имҩаԥысраны иҟоу егьырҭ аспектакльқәа рҟынгьы убас шыҟало агәра згоит. Аԥснытәи ахәаԥшҩцәа, шәколлектив нашәыдкыланы шәбара иеигәырӷьоит. Напхгара зышәҭо аколлектив иахьа ара Аԥсны иахьыҟоу даара агәахәара ҳнаҭоит. Ари хҭыс бзиоуп, ҳгәыӷуеит итрадициангьы иҟалап, есышықәса шәаҳҭаалап ҳәа.

Иҭабуп ҳәа шәасҳәарц сҭахуп аԥсуа хәаԥшҩы ишәҭаз аҭагылазаашьазы. Гәадураны иҳадаҳкылоит акультура аганахьала ҳусеицура. Ари акрызҵазкуа хырхарҭоуп. Акультура ҳажәларқәа, ҳҳәынҭқаррақәа еизааигәанатәуеит. Акультура акәын ахаангьы аимадара бзиақәа шьақәзыргылоз, ажәларқәа еизааигәазтәуаз», - ҳәа иҳәеит Бадра Гәынба.  

Аҳәынҭқарра Ахада Евгени Книазев ихы иқәкны, инаҵшьны иазгәеиҭеит акадрқәа разыҟаҵаразы аусеицура иамоу аҵак ду. Аҳәынҭқарра Ахада игәалаиршәеит 2014 шықәсазы раԥхьаӡакәны аспециалистцәа ҿарацәа разыҟаҵаразы аҵарахьы ишышьҭыз.

«Шәара ҳтәылазы ҩыза дууп ҳәа шәҳаԥхьаӡоит. Исгәаламшәар ауам, 2014  шықәсазы раԥхьаӡакәны аспециалистцәа разыҟаҵаразы аҿар алхны ишаҳашьҭыз аҵарахьы. Иахьа урҭ Фазиль Искандер ихьӡ зху Аҳәынҭқарратә аурыст драматә театри Самсон Ҷанба ихьӡ Аԥсуа ҳәынҭқарратә драматә театри рыҟны қәҿиарала иқәгылоит.  

Усҟан иҟаҳҵаз аус иахьа ҳазгәдуны аӡбахә ҳҳәоит. Агәра згоит аԥхьаҟагьы иҳалшо зегьы шыҟаҳҵало иахьа ауасхыр ззышьҭаҵоу аусхк аихаҳара зылшо, акультура аусхк знапы алаку аҿар реиҵааӡаразы»,  — ҳәа  иҳәеит Бадра Гәынба.

Аҳәынҭқарра Ахада Фазиль Искандер ихьӡ зху Аҳәынҭқарратә аурыс драматә театр адиректор Хада Хынҭәба Иракли иҭабуп ҳәа иеиҳәеит  имҩаԥиго аусуразы.

«Иҭабуп ҳәа шәасҳәарц сҭахуп имҩаԥыжәго аусуразы. Уи иамоу ақәҿиарақәа убартә иҟоуп. Гәахәароуп, Аԥсны иара убас хьӡы змоу аԥсуа театртә ҟазара еиқәырханы аихаҳара ахьымҩаԥысуа атеатртә тәыла аҳасабала иахьрыдыркыло. Ҳара ҳаззыгәдуу аҟазацәа ҳамоуп. Ҳара ҳрызгәдууп зхатә хаҿра змоу аԥсуа культура аиқәырхараҟны злагаламҭа дуу ататралцәа рабиԥарақәа», — иҳәеит Аҳәынҭқарра Ахада.

Аҳәынҭқарратә академиатә театр адиректор Кирилл Крок инаҵшьны иҳәеит атеатр раԥхьаӡакәны Аԥсныҟа иахьааз инамаданы аколлектив аара иамоу аҭоурыхтә ҵакы атәы.

«Ҳара иаҳбеит Евгени Вахтангов ихьӡ зху атеатр шәышықәсатәи аҭоурых аҩныҵҟала, 105 шықәса рыла, Аԥсны уажәада ишымаацыз. Шьҭа ҳацәымшәо, Аԥсны гастроль ҳасабла ҳшыҟаз ҳҳәоит.   Раԥхьатәи ашьаҿа ҟаҵоуп, аԥхьаҟатәи ҳазхәыцлап, аҿиара ҳалагап. Ҳара ҳтеатр асценақәа фба амоуп. Сасра ҳанаауаа ишәзааҳгаша ҳамоуп есқьынгьы. Сгәы иаанагоит ари традициа бзианы иҟаҵатәуп ҳәа», — иҳәеит Кирилл Крок.

Урыстәылеи Аԥсни Жәлар рартист Борис Шьукин ихьӡ зху Атеатртә институт аректор Евгени Книазев иазгәеиҭеит агастрольқәа ишрымоу иҷыдоу астатус.  «Гәахәароуп сара сзы, ҳтәыла, Урыстәыла апрограмма «Агастроль дуқәа» рымҩаԥгара иахьалагаз, Урыстәыла аҩныҵҟеиԥш, иара убас егьырҭ атәылақәа рҟынгьы. Аԥсныҟа раԥхьаӡакәны ҳахьааз тәылоуп ари апрограммала. Ари иаҳәоит ҳара ҳшеизааигәоу, ҳаизыҟазаашьақәа аԥхьаҟа аҿиара шроуа атәы», — иҳәеит Евгени Книазев.

Вахтангов ихьӡ зху Аҳәынҭқарратә академиатә театр агастрольқәа Аҟәа имҩаԥысуеит афедералтә программа «Агастроль дуқәа» аҳәаақәа ирҭагӡаны. Абҵарамза 6 инаркны 9-нӡа москватәи атеатр ахәаԥшҩцәа иднарбараны иҟоуп аспектакльқәа ԥшьба.