Аҟәша «Апоезиа» аҿы арубрика «Ҳара иаҳҭааит Аԥснытәи апоетцәа» аҿы Вахтанг Абҳазоу, Владимир Занҭариа, Илона Кәыҵниа, Анатоли Лагәлааи Гәында Сақаниеи иааркьаҿны рнысымҩақәеи рфотосахьақәеи ацны раԥҵамҭақәа  кьыԥхьхеит.

Аусмҩаԥгатә рхы аладырхәит иагьықәгылеит Аԥсны ашәҟәыҩҩцәа Реидгыла ахантәаҩы Вахтанг Абҳазоу, Аԥсны ашәҟәыҩҩцәа Рассоциациа ахантәаҩы Владимир Занҭариа, апоет, апрозаик Артавазд Сарециан, ауаажәларратә усзуҩ Беслан Кобахьиа, апоетесса Илона Кәыҵниа, ажурналист Леила Ԥачлиа, уҳәа убас егьырҭгьы. Урҭ ас еиԥш акультуратә еимадара иамоу аҵакы ахадара иалацәажәеит, аԥсуа культура адоуҳатә культура ахь алагала иазааҭгылеит.  

Аӡыргара иалахәыз аԥснытәи апоетцәа рырҿиамҭақәа альманах аҿы ркьыԥхьра ҳаамҭазтәи аԥсуа поезиа Урыстәыла еиԥш егьырҭ атәылақәагьы рҿы ирдыруа ишалагаз арҵабыргуеит ҳәа иазгәарҭон.

Апрозаик, апоет, аессеист, асахьаҭыхыҩ, ауаажәларратә усзуҩ, Фазиль Искандер ихьӡ зху Жәларбжьаратәи апремиа алауреат Владимир Делба ихьӡала имаҷымкәа аџьшьаратә ажәақәа рҳәеит. Иара активла инаигӡаз аусура иабзоурахеит аԥснытәи авторцәа ражәеинраалақәа альманах аҭыжьымҭа ҿыц адаҟьақәа иахьырналаз.

Вахтанг Абҳазоу, Владимир Занҭариеи Владимир Делбеи аиҭагаратә ус аҿиара иаҵоу аҵакы ахадара ҷыдала иазгәарҭеит.

«Аӡыргара аԥхарра аҵаны имҩаԥысит. Ари ахҭыс альманах ҿыц адгалара мацара адагьы амилаҭтә культура жәларбжьаратәи алитературатә ҵакырахь аинтеграциа амҩахь акыр зҵазкуа шьаҿаны иҟалеит. Ҳәарада, уи зегьы аԥснытәии урыстәылатәии арҿиаратә еиҿкаарақәа ирыбжьоу аимадареи хра злоу аусеицурақәеи ирылҵшәаны иҟалеит», –  ҳәа Аԥсныпресс акорреспондент диҿцәажәо иҳәеит Вахтанг Абҳазоу.