Аиԥылараҟны иҟан: Аԥсны Аԥсылманцәа рдоуҳатә акзаара аусбарҭа амуфҭи Ӡыба Ҭемыр, Адыгеиа Ареспубликеи Краснодартәи атәылаҿацәи  Аԥсылманцәа рдоуҳатә акзаара аусбарҭа амуфҭи Аскарби Карданов,  аҩныҵҟатәи аполитиказы Урыстәылатәи Афедерациа Ахада Иусбарҭа адинхаҵаратә еиҿкаарақәа русеицуразы адепартамент аиҳабы Евгени Ериомин, Краснодартәи атәылаҿацә администрациа аҩныҵҟатәи аполитика Адепартамент аиҳабы актәи ихаҭыԥуаҩ Вадим Кондратенко, Аԥсны Аҳәынҭқарра амилаҭқәа русқәа рзы,  ҳџьынџьуаа рымадарзы, аинформациатә хархәгақәа рзы аилак ахантәаҩы Довлеҭ Долев, аԥсылман культуреи, аҭҵаарадырреи аҵараиуреи адгылара рыҭаразы Афонд аиҳабы (ақ. Москва) Михаил Гриазнов, Иеизаку адинхаҵаратә еиҿкаара "Жәларбжьаратәи  аԥсылман миссиа" ахантәаҩы Шафиг Ԥшихачев.

Аиԥылара алахәцәа аԥсшәа раҳәо, Ахада иазгәеиҭеит ҳаиашьаратә жәларқәа рдоуҳатә акзаара символра азызуа, Аԥсны имҩаԥысуа афорум аҵакы.

«Аԥсны шәбара сеигәырӷьоит. Ашәышықәсақәа иргәылганы иааҳгоит ҳаилибакаара, ҳкультурабжьаратә еимадарақәа. Ари Афорум иаанарԥшит ҳадгьыл еснагь гәаартыла асасцәа шаднакыло, акультурабжьаратәи аконфессиабжьаратәи еимадара арҿиара ишацхраауа.

Аԥсны аԥсылманцәа ҳтәыла аҿиараҟны рлагаламҭа ыҟоуп. Уи ҳуаажәларра иузаҟәымҭхуа хәҭаны иҟоуп. Ҳара ҳаигәырӷьоит абри аҩыза аҭагылазаашьа ахьҳамоу - аиҿцәажәара амҩаԥгаразы, ҳаиашьаратә жәларқәа рхаҭарнакцәеи ҳареи аизыҟазаашьақәа рышьақәыргылара.

Сара иазгәаҭарц сҭахуп  Нхыҵ-Кавказтәи ажәларқәеи ҳареи ҷыдала ҳшеизааигәоу. Ҳарҭ ҳаидыркылоит иҵаулоу аҭоурыхтә, акультуратә, адоуҳатә еимадарақәа. Уи ҳара ҳзыхӡыӡаауа ауп, аԥхьаҟагьы хымԥада иҳахьчароуп.

Агәра згоит, ари афорум еиҳагьы ҳшеизааигәанатәуа, аконфессиабжьаратәи адинбжьаратәи ҭышәынтәалара шахьчо ҳтәылаҟнеиԥш, уи анҭыҵгьы, Урыстәылатәи Афедерациа адгьылҵакыраҟны.  Ишәзеиӷьасшьоит аихьӡарақәа», - ҳәа иҳәеит Бадра Гәынба.

Аиԥылара иалахәыз Ахада иҭабуп ҳәа иарҳәеит аԥхарра зцыз адкыларазы, ирҳәеит афорум хықәкыс ишамоу Урыстәылеи Аԥсни рганахьала иҟоу аполитикатә шәарҭарақәа рылацәажәара, адәныҟатәи ақәыӷәӷәара аҿагыларазы ажәларқәа ракзаара арӷәӷәара. Афорум иалнаршароуп аимадарақәа рырӷәӷәара атәылауаа алархәны, иара убас ауаажәларраҟны аҭынчреи аҭышәынтәалареи шьақәзыргыло азеиԥш культуратә, аетносбжьаратә ҭынха еизҳауа абиԥарақәа рымадара.

«Иҭабуп ҳәа шәасҳәоит иҟашәҵаз адкыларазы. Ҳгәы иахәоит Аԥсны афорум ахьымҩаԥысуа.

Аныҟәарақәа аҳәаақәа ирҭагӡаны алшара сыман Аб Бассариан иԥыларазы. Ҳаиԥылара даара деигәырӷьеит, акыи ишьҭыхны дрылацәажәеит Аԥсны  апсылманцәа, иазгәеиҭеит аҳәынҭқарра аргылареи ахьчареи рыҟны ракзаара, иара убас егьырҭ аконфессиақәа рхаҭарнакцәа рахь ирымоу азыҟазаашьа атәы.

Ҳара иара убасгьы ҳадгылоит адинхаҵаратә еиҿкаарақәа аус рыцуразы Ахеилак аԥҵара аус.  Ҳара ҳганахь ала, ганрацәала Кавкази Аԥсни аԥсылманцәа рыбжьара аимадарақәа рырӷәӷәареи рырҿиареи ҳацхраалоит.

Аԥсны аҿиара иаҿуп. Ҳара иаҳбарҭоуп акультура, аҭҵаарадырра, атуризм ҩаӡара ҳаракыла аҿиара ишаҿу.

Ҳара ахә ҳаракны иаҳшьоит аԥсуа жәлар Урыстәылазы ашьа ахькарҭәаз. Уи ашьа аҵыхәтәантәи ашықәсқәа рзы мацара акәӡам ианкаҭәо, ус иҟан ҳзеиԥш ҭоурых аҩныҵҟа акырынтә . Уи хымԥада ҳаизааигәаатәит.

Ҳаҭыр зқәу, Бадра Зураб-иԥа, аҭакԥхықәра зцу шәусураҟны ишәзеиӷьасшьоит аихьӡарақәа!»