Атәылахьчара аминистр инапынҵақәа рынагӡаразы даҭан аполковник Владимир Аршба, Арбџьар мчқәа р-Штаб хада аиҳабыс – аполковник Султан Сосналиев. Ирыдыркылаз азыӡбақәа рыхә ашьара уадаҩуп.

Аминистрреи Аштаб хадеи раԥҵара иалахәыз зегьы, хьӡи- ԥшеи згым адҵаҟаҵаҩцәа рыхьыӡқәа, Аԥсадгьыл ахьчаҩцәа рфырхаҵара хьтәы нбанла ҳтәыла ҳҭоурых ианылеит наунагӡа.

Ҳажәлар зегьы акырӡа зҵазкуа абри амш аҽны ҷыдала иҭабуп ҳәа расҳәар сҭахуп иԥшьоу Аиааира аагаразы иаадырԥшыз агәымшәареи афырхаҵареи рзы Арбџьар Мчқәа рветеранцәа. Хамеигӡарак ҟамҵакәа шәгылан ҳҳәынҭқарра ахьыԥшымра ахьчаразы иуадаҩыз аибашьра ашьҭахьтәи ашықәсқәа рызгьы.

Хашҭра рықәым, наунагӡа ҳажәлар ргәалашәараҿы иҟазаауеит зҭоуба иацәхьамҵыз, Аԥсадгьыл ахьчара зхы ақәызҵаз афырхацәа.

Ҳаамҭазтәи аррамаҵзурауаа рабиԥара ҿыцқәа аиҳабацәа иааргаз атрадициа шьахәқәа еицамккәа, ԥхьаҟа иргоит. Иахьа Аԥсны Аҳәынҭқарра Арбџьар мчқәа аҭынчреи, Аԥсны Аҳәынҭқарра ахьыԥшымреи, акзаареи рыхьчаразы игылоуп.

Иазгәасҭарц сҭахуп, аҳәынҭқарра, иҟоу агеполитикатә ҭагылазаашьа ҳасаб азуны, аԥхьаҟагьы иааиԥмырҟьаӡакәа Арбџьар мчқәа рырҿыцра, рматериатә-техникатә база арӷәӷәара гәцаракра шанаҭало.

Аҩызцәа аррамаҵзурауаа, Арбџьар мчқәа рветеранцәа, ари аныҳәамш аҽны ишәзеиӷьасшьоит агәабзиара, агәамч, анасыԥ.