Афорум аусутә программа аҳәаақәа ирҭагӡаны Урыстәыла акультура аминистр Ольга Лиубимова аҳәаанырцәтәи атәылақәа рҟынтәи лколлегацәа дырԥылеит. Аиԥылараҿы ирылацәажәеит акультуратә еимадара аперспективақәеи акультуреи аҟазареи русхкқәа рҿы аусеицура аҳәаақәа рырҭбаареи. Ҷыдала ахшыҩзышьҭра аҭан акультуратә усеицура иазырхоу наҟ-ааҟтәи апроектқәа.
Аԥсны акультура аминистр Даур Ақаҩба иқәгылараҿы аԥсны-урыстәылатәи акультуратә еимадарақәеи наҟ-ааҟтәи апроектқәеи дрылацәажәеит. Уи адагьы уи иазгәеиҭеит 2024 шықәсазы 2025 шықәсазы иазԥхьагәаҭахо атеатралтә ҟазара, жәлар рырҿиара, акинематографиа, амузеи аус, асахьаҭыхратә ҟазара, абиблиотекатә маҵзура, уҳәа аусхкқәа зымҽханакуа аусеицура Аплан анапаҵыҩра шымҩаԥгаз.
«Ҳара ҳусеицура аҩтәылак ркультуратә лаԥшҳәаақәа дырҭбаауеит. Урыстәыла адгылара ала Амилаҭтә сахьатә галереиа аиҭашьақәыргылара хыркәшахеит, Аҟәа, Арратә Ахьӡ-Аԥша амузеи аҿы Аџьынџьтәылатәи еибашьра Дуӡӡа иазкны иаатит «Аиааира акино» ацәыргақәҵа, нанҳәамзазы Фазиль Искандер ихьӡ зху аурыс театр аҿы аусура иалагеит, Бахрушинтәи амузеии дареи еицырзеиԥшу апроект ала атеатралтә музеи», -ҳәа иҳәеит Аԥсны акультура аминистр.
Иара убас, «Астратегиатә аԥшьгаратә маҵзура» аусацуразы Амеморандум анапаҵаҩра мҩаԥгахоит.
«Цәыббрамза анҵәамҭазы абылра ашьҭахь еиҭашьақәыргылаз Аԥсны асахьаҭыхыҩцәа Реидгыла ацәыргақәҵатә зал Хада аартра азԥхьагәаҭоуп. Уи аусура Аԥсни Урыстәылеи ркультура Аминистррақәа иҟарҵаз адгыларала Урыстәылатәи аҟазара агалереиа ала еиҿкаахаз раԥхьатәи ацәыргақәҵа «Аладатәи ажәҩан аҵаҟа» ала ихацыркхоит», - ҳәа иазгәеиҭеит аминистр.
Ольга Лиубимова акультура жәларбжьаратәи аизыҟазаашьақәа рырӷәӷәареи ажәларқәа рыбжьара аилибакаара ашьақәгылареи рзы ихадоу акакәны иҟоуп ҳәа иазгәалҭеит. «Ҳара ҳаилатәара иахьа иуникалу аформат, иаарту аиҿцәажәара ала имҩаԥсуеит. Абас иҟоу аиԥыларақәа рҿы ауп еиуеиԥшым атәылақәа ркультура аминистррақәа рҟынтәи актуалра злоу, астратегиатәи аконструктивтәи аидеиақәа ахьцәырҵуа. Акыр аҵанакуеит ҳара акультуратә политика азҵаарақәа рыла ҳгәаанагарақәа ахьеиқәшәо. Ҳара акультуреи аҭоурыхтә ҭынхеи реиқәырхара аганахьала еиԥшу ахықәкқәа ҳамоуп.
Ҳтәылақәа зинла еиҟароу аганқәа рдиалог адгылара аҭара, жәларбжьаратәи аимадареи аилибакаара ашьақәыргылареи рзы иманшәалоу аҭагылазаашьақәа раԥҵара иазхиоуп. Агеополитикатә еиҭакрақәа раамҭахәҭа азы ҳара еилаҳкаауеит ари аамҭа алшара ҿыцқәа рцәыргара анаҩс ҳара зегьы ҳԥеиԥш азы аҭакԥхықәра ду удызҵо аамҭаны ишыҟоу еилаҳкаауеит», – ҳәа илҳәеит Ольга Лиубимова.
