Аҽазыҟаҵарақәа актәи аетап атактикатә зыҟаҵареи акомплекстә усмҩаԥгатәқәеи, иара убас иҷыдоу аҭагылазаашьақәа раан иԥку аҵакыраҿы ахымҩаԥгашьеи ахысразы аҽазыҟаҵареи ирыдҳәалахоит.  

Аҩбатәи аетап Аԥсны аиустициа Аминистрра аӡбаратә нагӡаҩцәа рмаҵзура иҷыдоу аҟәшеиҵақәеи ирласны азхьаԥшра агәыԥқәеи, Урыстәылатәи Афедерациа аӡбаратә қәҵарақәа рынагӡара аиҿкааҩцәа рмаҵзуреи Аахыҵ Уаԥстәыла Аиустициа Аминистрра аӡбаратә қәҵарақәа рынагӡара аиҿкааҩцәа рмаҵзуреи иҟалар зылшо аҷыдалкаатә ҭагылазаашьаҿы, иаагозар, аӡбаратә еилатәара амҩаԥгараан бџьарла еиқәных иҟоу ауаа ргәыԥ аобиект ахь рнеиреи аӡбаратә усмҩаԥгатә алахәылацәа шасыс раанкылареи иадҳәалоу аҭагылазаашьа аан аӡбарҭақәа русура шьақәзыргыло ауснагӡатәқәа реицынагӡара аҽазыҟаҵара иадҳәалахоит.  

Ахԥатәи аетап ашьхара иаԥну аҵакыраҿы ашьаҟатә маршрут алкаарала атактикатә ныҟәара-ыиасра, аҳаракырахь ахалареи анаҩс уаҟа ахылаԥшырҭақәа-алахәылацәа рбираҟқәа рышьақәыргылареи иадҳәалахоит.

Урыстәылатәи аделегациа аилазаараҿы иҟоуп – Урыстәыла аӡбаратә нагӡаҩцәа рфедералтә Маҵзура адиректор ихаҭыԥуаҩ Алеқсеи Рогозин, Урыстәыла аӡбаратә нагӡаҩцәа рфедералтә Маҵзура адиректор ихаҭыԥуаҩ Владимир Воронин, Урыстәыла аӡбаратә нагӡаҩцәа рфедералтә Маҵзура Москва ақалақь аҿы Аусбарҭа Хада иҷыдоу азкызаара змоу аҟәша аиҳабы ихаҭыԥуаҩ Алеқсандр Мишин.

Аахыҵ Уаԥстәыла аҟынтәи ари аусмҩаԥгатә иалахуп Аахыҵ Уаԥстәыла Ареспублика аӡбаратә нагӡаҩцәа рмаҵзура анапхгаҩы Вадим Џьагаев.

Аҽазыҟаҵарақәа мҩаԥысуеит Аԥсны аиустициа аминистр ихаҭыԥуаҩ Руслан Лагәлаа идҵаҟаҵарала.