Нанҳәамза 26 азы Аԥсны аҳәынҭқарратә хьыԥшымреи асуверенитети Урыстәылатәи Афедерациа иазханаҵеижьҭеи 17 шықәса ҵуеит. Аҭоурыхтә усԥҟа No1261 инапы аҵаиҩит Урыстәыла ахада Д.А. Медведев, 2008 шықәса нанҳәамза 26 азы.

«Ари алахьынҵатә ӡбамҭа, амилаҭтә хақәиҭратә қәԥараан зхалахатәҳәаақәҵаратә зин зыхьчоз аԥсуа жәлар рганахь ала аҭоурыхтә аиаша аиҭашьақәыргылара иашьананы иҟалеит. Урыстәыла аганахьынтә ахьыԥшымра азхаҵара Аԥсны Аҳәынҭқарра аҭынч ҿиареи аҭышәынтәалареи хәдықәҵара ауит, ҳҳәынҭқарреи уи атәылауааи ршәарҭадаразы игәрагоу ашьаҭа шьақәнаргылеит.

Иҳаҩсыз 17 шықәса ирылагӡаны шәышықәсалатәи аиҩызареи аешьареи ртрадициақәа шьаҭас измоу Аԥсни Урыстәылеи реизыҟазаашьақәа зегьрылатәи астратегиатә еиҩызареи аидгылареи рыҩаӡара аҟынӡа ихалеит. Аполитикатә, аекономикатә, асоциалтә, акультуратә усхкқәа зегьы рҿы аимадара динамикала аҿиара амоуп.

Ҳаамҭазтәи Аԥсны, аԥсны-урыстәылатә усеицура шьаҭа ӷәӷәаны иҟаҵаны, ихьыԥшым демократиатә ҳәынҭқаррак аҳасаб ала агәрагара аарԥшны аҿиареи жәларбжьаратәи апозициақәа рырӷәӷәареи иаҿуп, еизҳазыӷьо ауаажәларра аргылара аганахь амҩа иқәуп», - ҳәа иазгәаҭоуп Аԥсны адәныҟаполитикатә хылаԥшырҭа Хада иаланарҵәаз аҳәамҭа аҿы.