Аганқәа ирылацәажәеит аҳәынҭқарратә статистика аҿиара астратегиатә хырхарҭақәа, ауааԥсыра рышәҟәҭаҩра, иара убас хазы игоу астатистикатә шьклаԥшрақәа ирыдҳәалоу азҵаарақәа жәпакы.
«Урыстәыла иҟанаҵо адгылара ҳаамҭазтәи аметодқәа аусура ралагалареи атәыла анапхгара еиҳа ииашоу адыррақәа рыҭареи иацхраауеит. Аԥсны 2011 шықәса раахыс раԥхьаӡа акәны ауааԥсыра рҭаҩра амҩаԥгара азԥхьагәаҭаны иҳамоуп. Уи аахыс атәыла аҩнуҵҟеи, астатистикатә маҵзурақәа русураҿгьы акыр аҽаԥсахит, убри аҟнытә атехнологиа ҿыцқәеи аметодологиеи ирызку аинформациа аиура хымԥадатәиуп», - ҳәа инаҵшьны иазгәалҭеит Астатистиказы аҳәынҭеилакы ахантәаҩы Кама Гогьиа.
