Лаҵарамза зегьы иалагӡаны аурыс театр атруппа  атеатр адиректор Хада инапхгарала Урыстәыла атеатралтә қалақьқәа рҿы – Пермь, Екатеринбург, Челиабинск агастрольқәа мҩаԥыргон.

Иракли Хьынҭәба иажәақәа рыла, зехьынџьара атеатр аспектакльқәа аншлаг ацны имҩаԥысит.

«Абилеҭқәа зегьы заанаҵы иаархәахьан, уи ҳара ииашоу амҩа алхны ҳануп ҳәа ауп иаанаго. Челиабинск ақалақь аҿы, иаагозар, ҳара уахь иреиӷьу аспектакльқәа аманы иаахьаз Е. Вахтангов итеатр ашьҭахьҵәҟьа ҳахәмаруан. Азныказы ари аконстрасти аиҿырԥшреи хра злам анырра анаҭар ахәаԥшцәа рыдкылара ҳәа ҳшәон. Аха аншлагқәа рыҟазаара анаҩс, ҳхахьы иаҳзаамгоз ақәҿиара ҳауит», - ҳәа еиҭеиҳәеит Иракли Хьынҭәба.

Атеатр адиректор Хада ишазгәеиҭаз ала, аспектакль қәҿиарала ақәгылара уи ахәаԥшцәа рҿы анаҩстәи адкылара иадҳәлахоит:

Урысшәала иуҳәозар «Сарафанное радио» ҳәа изышьҭоу уҳәан-сҳәан, ижәбама-ишәаҳама – ари зегьы реиҳа аӡыргара иацхраауа акакәны иҟоуп. Аха ари ӡыргараӡам, пиарӡам, ауаа рыхәшьара ҿырҳәала ианырҳәо – убри  ауп зегьы реиҳа аус зуа. Убасҵәҟьоуп араҟа Аԥсны ишыҟоугьы: ауаа  ҳаспектакльқәа ианырҭаалак ашьҭахь доусы рықалақьқәа рахь ианыхынҳәлак, ҳаргьы уахь ҳаннеилак, дара хымԥада ҳаспектакльқәа ирҭаауеит».

Хыхь иарбоу ах-қалақьк рҿы аԥснытәи атеатр апублика иднарбеит апиесақәа «Ахьча Махаз», «Абацәеи аԥацәеи», иара убас Пермь ақалақьи  Челиабински рҿы еицырдыруа «Софичка» ддырбеит. Агастрольқәа рахь иргеит аспектакльқәа-ахитқәа. Иаагозар, «Ахьча Махаз» ашықәсқәа инеиԥынкыланы азал харҭәааны еизнагоит, ари аспектакль 25-нтә еиҳаны ирыхәмархьеит, «Софичка» – 40-нтә еиҳаны.

«Абацәеи аԥацәеи» – аурыс классика ала иҿыцу спектакльуп – ааигәа Урыстәыла акультура Аминистрра апроект «Агастроль дуқәа» («Большие гастроли») аҳәаақәа ирҭагӡаны Санкт-Петербург ақалақь аҿы имҩаԥысуаз  А. А. Брианцев ихьӡ зху Ахәаԥшыҩ қәыԥш Итеатр (ТЮЗ) Жәларбжьртәи афестиваль аҿы ибзиоу ахцәажәара аиуит.  Адунеи зегьы аҟынтәи иреиӷьу атеатрқәа, арежиссиорцәа, аспектакльқәа ари афестиваль иаҭааит. Аԥсны аҳәынҭқарратә аурыс драматә театр абар ҩынтәны уи ахы аланархәан, хәы-шықәса раԥхьа уи араҟа ахәаԥшцәа иднарбеит аспектакль «Электра». Ас еиԥш иҟоу афестивальқәа рылахәхара алҵшәа бзиақәа аанарԥшуеит – убас ала Аԥснытәи аҳәынҭқарратә аурыс драматә театр аӡбахә еиҳагьы ираҳауеит еиҳагьы ааԥхьарақәагьы аиулоит.  

«Уи уамеигәырӷьар залшом. Урыстәыла ҳара ҳахьырзымдыруа ыҟаӡам – Сахалин инаркны Калининград аҟынӡа. Ааигәа, рашәарамза 23  рзы ҳара Шәачаҟа ҳцоит. Ҳара ҳхала арҭ агастрольқәа реиҿкаара ҳҽазаҳшәеит, Аӡынтәи атеатр қьырала иаанаҳкылеит, агәра ганы ҳаҟоуп ахәаԥшыҩ дышҳауо. Шәачаа   – ҳтеатр есымшатәи ахәаԥшцәа ракәны иҟоуп. Ҳара аиашазы  Аԥсни ҳаҭыр ҳзақуп Аԥсни Урыстәылеи рыбжьара  аусеицуреи аиҩызареи аимадареи рыцҳа аҳасабала аусура ахьҳалшо. Сара даара сеигәырӷьоит ҳара ари амиссиа еффективла аиҿкаареи анагӡареи ахьҳалҳаршо», – ҳәа иҳәеит Аурыс театр анапхгаҩы хада.

Иракли Хьынҭба агастрольқәа – атеатр иҭышәынтәаланы аҿиаразы ихымԥадатәиу ҭагылазаашьоуп ҳәа иԥхьаӡоит:

«Актиор даҽа  аудиториак даҭаартә еиԥш алшара имамзар, даҽа публикеи иареи  аиҿцаара рыбжьамзар, аенергиа амадара ыҟамзар, актиор ихаҭа изы иара Аԥсны адагьы уи анҭыҵгьы  аинтерес иҵаны дҟалар шалшо  изышьақәмырӷәӷәозар, усҟан аенергиа атеатр аҿы ишьаҽуеит.  Зегьы иара инамҩатәны ицалоит, уи даара ихәарҭам усуп. Актиор изы зегьы ирыцку асценахь ацәырҵра ауп, уи ада дхәарҭам, усҟан ауп актиор дактиорны даныҟало. Убри азы сара даараӡа сеигәырӷьоит ҳара есыҽны аспектакльқәа ҳахьыхәмаруа. Ҳара шьҭа акагьы ҳацәшәо ҳаҟам, иарбанызаалак агастрольқәа ишахәҭоу инаҳагӡартә ҳаҟоуп. Избан акәзар ихымԥадатәиу азанааҭтә ҩаӡареи ахыԥшеи ҳарҳахьеит».

Сынтәа, ҭагалан анҵәамҭазы Аԥсны аҳәынҭқарратә драматә аурыс театр Москваҟа агастроль дуқәа рымҩаԥгара азԥхьагәаҭоуп.