Азауәд аусура аиҭашьақәыргылара араион аекономика хра злоу анырра анаҭароуп, аҭыԥантәи ауааԥсыра инацҵаны аусуратә ҭыԥқәа рыла реиқәыршәара алнаршароуп.

Ақыҭаҿы аус ауеит афермер Мераб Шәардлаа иҳаҩсыз ашықәс азы иааиртыз аԥсаатәааӡарҭа афабрика. Ари анхамҩа иарку ацикл змоу  анаплакы ауп, араҟа ирааӡоит 5000 инарзынаԥшуа аброилер ҳәа изышьҭоу ҩымз зхыҵуа ахәҷарақәа. Аалыҵ аҩныҵҟатәи аџьармыкьа аҿы ирҭиуеит. Афермер аминистр иахь аҳәара ҟаиҵеит аиҭашьақәыргылара зҭаху аҭыжьратә хыбра ахыб азҵаара аӡбараҿы ацхыраара ирҭарц.

Аминистр Зҭакԥхықәра Ҳәаақәҵоу Аилазаара «Кындыӷ-Агро» (анапхгаҩы Алик Коӷониа) иатәу арԥхарҭатә нхамҩагьы даҭааит. Анаплакы 2017 шықәсазы альготатә кредитра ашьаҭала иргылан (афинансркра амҽхак  – 300 млн. мааҭ иреиҳауп).

Аамҭак азы ари арԥхарҭатә нхамҩа аҿы аспециалистцәа разымхара иахҟьаны атехнологиатә процесс иадҳәаланы ауадаҩрақәа цәырҵуан. Уажәы апроблема ӡбоуп, анаплакы иҭнажьуа аалыҵ – 300 инаркны 500 тонн рҟынӡа,  уи аҩныҵҟатәи аџьармыкьахь инагахоит, убасҵәҟьа Краснодартәи атәылаҿацә ахь експортла идәықәҵахоит.