Аҟәа. Рашәарамза 3, 2025 шықәса. Аԥсныпресс. Иҳаҩсыз ашықәс азы Санкт-Петербурги Аԥсни рыбжьара ахәаахәҭратә еикәыршара ҩынтә иазҳаит, уи 15,5 млн. доллар рҟынӡа инаӡеит.
Арҭ арбагақәа рашәарамза 3 рзы Смольныи имҩаԥысыз Санкт-Петербург агубернатор Алеқсандр Беглови Урыстәылеи Жә-ҳәынҭқаррак зҵазкуа Аҳәынҭқаррабжьаратәи Аидгыла (БРИКС) атәылақәеи рҿы Аԥсны Аҳәынҭқарра Ахада иҷыдалкаатә хаҭарнак Лаша Сақаниеи аҩадатәи аҳҭнықалақь аҿы ҳаҭыр зқәу аконсул Владимир Бигәааи реиԥылара аҿы иаарԥшын.
2024 шықәсазы Петербургынтәи Аԥсныҟа иааргон аоптикатә, ашәага-загатә, амедицинатә приборқәа, амашьынаргылара аалыҵқәа.
Аԥснынтәи Петербургҟа идәықәырҵон аиҳарак ашәыр, араса, иара убас амшын аалыҵқәа. Лаша Сақаниа агубернатор иҭабуп ҳәа еиҳәеит аиԥылареи аԥхара зҵоу адкылареи рзы, уи Аԥсны Ахада Бадра Гәынба иҟынтәи асалам ииҭеит.
Аганқәа анаҩстәи аусеицура иадҳәалоу азҵаарақәа жәпакы ирылацәажәеит.
