Аҟәа. Рашәарамза 2, 2025 шықәса. Аԥсныпресс. С.Ҷанба ихьӡ зху Аԥсуа драматә театр аҿы Аԥсни Урыстәылеи рырҿиаратә еидгыларақәа реиԥылара мҩаԥысит. Уи рхы аладырхәит Урыстәыла акультура аминистр ихаҭыԥуаҩ Сергеи Першини Аԥсны акультура аминистр Даур Ақаҩбеи.
Аиԥылара акульутра аусхкы аҿы аусеицуреи апроектқәа реицынагӡареи ирыдҳәалоу еиуеиԥшым азҵаарақәа ирызкын.
Аиԥылара анхыркәшаха ашьҭахь апресс-цәырҵра аҿы уи алахәылацәа ареспублика аҿы атеатралтә ԥсҭазаара алацәажәараан Ареспублика Аԥсны атеатралтә усзуҩцәа Реидгыла аусура аиҭахацыркра аидеиа цәырган ҳәа иазгәарҭеит.
Акультура аминистр Даур Ақаҩба ари аҩыза Аидгыла Аԥсны асовет аамҭазы иҟан ҳәа иазгәеиҭеит.
«Иахьа ҳара иҳамоуп аҳәынҭқарратә театрқәа ԥшьба. Урҭ активла аус руеит, аҿиара иаҿуп, ррепертуар ессааира идырҭбаауеит», – ҳәа атеатралтә усзуҩцәа Реидгыла аусура аиҭашьақәыргылара хра злоу аидеиа ауп ҳәа азгәаҭо иҳәеит иара.
Даур Ақаҩба Аԥсны атеатралтә фестиваль амҩаԥгаразы ажәалагала ҟаиҵеит.
«Сара ҳҳәынҭқарра Ахада сиԥылеит, ҳара аусуратә моментқәа ҳрылацәажәеит. Сара Аԥсны атеатралтә фестиваль амҩаԥгаразы аԥшьгара ҟасҵет», – ҳәа адырра ҟаиҵеит иара.
Аиԥылара иалахәыз Аԥсни Урыстәылеи рыбжьара амузеитә експонатқәа ралгареи ралагалареи рзы аԥҟара шьақәзыргыло аиқәшаҳаҭра ыҟаӡам ҳәа иазгәарҭеит.
«Ҳсахьақәа Урыстәылаҟа аиагареи, мамзаргьы Урыстәылантәи аагареи рзы азҵаара анҳазцәырҵлак, ҳара есымша аҳәаа аҟны ауадаҩрақәа ҳрықәшәоит», – ҳәа иазгәеиҭеит Даур Ақаҩба.
Иара игәаанагарала, ари азҵаара хымԥада аҩ-тәылак рнапхгарақәа рыҩаӡараҿы аӡбара ахәҭаны иҟоуп. Уи аӡбамҭа иадҳәалахоит Аԥсны еиԥш Урыстәылагьы ацәыргақәҵақәа реиҿкаареи рымҩаԥгареи.
«Ҳара иаҳҭахуп урыстәылатәи авторцәа рырҿиамҭақәа Аԥсны дырбара, убасҵәҟьа аԥснытәи аҟазацәа Урыстәыла дырбара», – ҳәа иажәа иацҵо иҳәеит Даур Ақаҩба.
Урыстәыла акультура аминистр ихаҭыԥуаҩ Сергеи Першин аиԥылара анхыркәшаха ашьҭахь аҩ-тәылак рырҿиаратә еидгыларақәа рхаҭарнакцәа рдиалог иаҵоу аҵакы ахадара азгәеиҭеит. Уи убри аан еиуеиԥшым Аԥсны акультуратә усбарҭақәа рнапхгаҩцәа рԥыларақәа азԥхьагәаҭоуп ҳәа иазгәеиҭеит.
«Ари даара акыр зҵазкуа диалогуп. Апрофессионалтә ҩаӡараҿы имҩаԥысуеит аусеицура арӷәӷәара, иҿыцу аимадарақәа шьақәгылоит, иҿыцу апроектқәа цәырҵуеит», – ҳәа ажурналистцәа иреиҳәеит иара.
Сергеи Першин иара убас еизаз ирылеиҳәеит ахәылбыҽха имҩаԥысраны иҟоу аиԥылара аҿы Аԥсны аусбарҭақәа рнапхгаҩцәа акульура аусхкы аҿы еффективла анапхграҭара азы ацәажәара шыҟало.
«Ҳара Урыстәыла акульура Аминистрра иҷыдоу аҵаратә программақәа рынагӡареи акадрқәа реиқәыршәареи аганахьала иамоу аԥышәа атәы еиҭаҳҳәоит», – ҳәа иҳәеит иара.
Аԥсны акультура аминистр Даур Ақаҩба Аԥсни Урыстәылеи рырҿиаратә еидгыларақәа рхаҭарнакцәа реиԥылара хра злоу алҵшәақәа шаиуо азы агәрагара ааирԥшит.
«Ҳара асовет аамҭазы ишьақәгылахьаз атрадициа бзиа иацаҳҵоит. Ҳара иҿыцу акгьы ҳалагаӡом – иҟоу аамҭеи аԥхықәрақәеи инарықәыршәаны уаанӡа иҟаз иацаҳҵоит», – ҳәа иазгәеиҭеит Даур Ақаҩба.
Аԥсны акультура аминистр акультура аусхкы аҿы Урыстәыла иамоу аԥышәа ахархәара акыр аҵак ду аҵоуп ҳәа иԥхьаӡоит.
Иахьа иара убас имҩаԥысит Урыстәылатәи Афедерациеи Ареспублика Аԥсни акультура аусхкы аҿы аԥыза ҿарацәа реиԥылара.
Урыстәылатәи Афедерациа ахьӡала аиԥылара иалахәын Урыстәылатәи Афедерациа акультура Аминистрра аҟны иҟоу Аҿартә Хеилак ахаҭарнакцәа, Аԥсны аганахьала – арҿиаратә аҿартә еиҿкаарақәа рхаҭарнакцәа.
