Аҟәа. Лаҵарамза 26, 2025 шықәса. Аԥсныпресс. Лаҵарамза 28 – 29 рзы имҩаԥысраны иҟоуп Аԥсуа аҿартә театр италиатәи адраматург, нобельтәи алауреат Дарио Фо еихьӡылоу ипиеса ала иқәыргылоу аспектакль-акомедиа «Иӷьычуа зегьы рҳәыҩцәам» аԥхьарбара.
Арҭ амшқәа рзы С.Ҷанба ихьӡ зху Аԥснытәи аҳәынҭқарратә драматә театр асцена аҿы имҩаԥысуеит аспектакль афиналтә ҽазыҟаҵарақәа.
Аспектакль ықәиргылоит Ачинтәи адраматә театр (Красноиарсктәи атәылаҿацәа ақалақь Ачинск) асахьаркыратә напхгаҩы, арежиссиор Никита Рак.
«Аспектакль "Иӷьычуа зегьы рҳәыҩцәам" — ари иҵару аиумор зҵоу, ауаҩы дзырччо, аха убри аамҭазы имариам асиужет змоу акомедиа ауп. Ҳара Аԥсуа аҿартә театр адиректрр далархәны апиеса алаҳхит. Апиеса алхраан аԥсшәахь еиҭаргахьоу арҿиамҭа аԥшаара хықәкыс иҟан. Сара уаанӡа ари апиеса сыздыруамызт, аха санаԥхьа ашьҭахь уи даараӡа исгәаԥхеит. Дарио Фо, нобельтәи апремиа алауреат, ирҿиара сагәыланахалеит», – ҳәа иазгәеиҭеит арежиссиор.
Апиеса аԥсшәахь еиҭеигеит актиор, Аԥсны Аҳәынҭқарра зҽаԥсазтәыз артист Роман Сабуа.
Аспектакль асахьаҭыхыҩ – Гарри Дочиа.
Вадим Абыхәба, аӷьыч ироль хада назыгӡо, атеатр аспектакль ҿыц акыр аинтерес аҵаны иԥхьаӡоит. Акомедиатә материал аус адулара актиор дагәылынахалеит.
«Даҽаӡәы ихаҿсахьа аарԥшра, аперсонаж иҩныҵҟатәи адунеи аарԥшра есымша имариам усуп. Аха зны-зынла арольқәа атемперамент ала еиԥш, уҩныҵҟатәи ҟазшьақәа рыла усура акыр иармариартә еиԥш иузааигәаны иҟалоит, Ҳара зегьы ҳусура ламысцқьала ҳазнеиуеит, агәрагьы ҳгоит зеиӷьаҟам алҵшәақәагьы шаарԥшхо», – ҳәа иҳәеит иара.
Аԥснытәи аҿартә театр адиректор Аслан Еныкь арепертуар алхраан иара аиҳарак акомедиақәа аԥхьа иширгыло, избан акәзар урҭ есымша ахәаԥшцәа рзы еиҳа аинтерес аҵоуп ҳәа иазгәеиҭеит. Атеатр арепертуар аҿы ари акомедиа аԥхьагьы иқәдыргылахьан италиатәи адраматургцәа рыпиесақәа рыла ақәыргыламҭақәа, машәыршақәгьы иҟамлаӡеит уи – аԥсуа темперамент италиатәи акыр иазааигәоуп. Аслан Еныкь игәаанагарала, убри азыҳәан ауп апиеса аматериал аԥсахра заҭахымхаз.
«Абжьааԥны арежиссиорцәа апиесақәа аиҭакрақәа маҷымкәа аларгалоит, аха араҟа аригинал ацәхьаҵра маҷӡак ада иҟамлаӡеит», - ҳәа инаҵшьны иазгәеиҭеит Аслан Еныкь.
Иара ишеиҭаи ҳәаз ала, аԥхьарбаратә қәгылара рхы аладырхәуеит Аԥснытәи аҳәынҭқарратә Университет актиортә факультет астудентцәа, - уи дара рдипломтә усураны иҟоуп. «Арежиссиор Никита Рак хаҭа-хаҭала актиорцәа зегьы рбаҩхатәра аарԥшра дацхрааит», – ҳәа иазгәеиҭеит атеатр адиректор.
Аспектакль ҩ-еилазаарак рыла ихәмаруеит. Актәи аилазаара аԥхьарбара рхы аладырхәуеит лаҵарамза 28 рзы, аҩбатәи аилазаара асценахь ицәырҵуеит лаҵарамза 29 рзы.
