Аҳәынҭқарра Ахада иазгәеиҭеит Адгәыр Ныгәзар-иԥа аусбарҭаҟны акыр шықәса аус залиухьо ала, аколлектив аҟны ибзианы дшырдыруа. «Апрокуратура хада ҷыдала аҭакԥхықәра адуп. Шәара шәусура атәылаҟны азакәан ақәныҟәара, аԥсҭазаара ахаҭабзиара аиӷьтәра, атәылауаа ршәарҭадара ралыршара иазкуп.  Агәра згоит Адгәыр Ныгәзар-иԥа арҭ ахықәкқәа рынагӡара ишазикуа изанааҭтә ҟазшьа аҷыдарақәа зегьы», – иаҵшьны иҳәеит Гәынба  Бадра. 

Агрба Адгәыр Аҳәынҭқарра Ахада иҭабуп ҳәа иеиҳәеит ирҭаз агәрагаразы, ари ҭакԥхықәра дууп, избан акәзар, рҿаԥхьа иқәгылоуп зымҽхак дуу, зыдкылара аҭаху аҵак ду змоу азыӡбақәа. «Апрокуратура аусзуҩцәа рыпрофессионализми рԥышәа дуи ҳасаб рзуарала, агәра згоит азакәани азинтә леишәеи рырӷәӷәаразы аусура аиҿкаара шҳалшо», - ҳәа  иҳәеит Апрокурор хада Адгәыр Агрба.