Аҟәа. Лаҵарамза 7, 2025 шықәса. Аԥсныпресс. Аҟәа араион Гәымсҭа ақыҭан амемориалтә комплекс аартра иазкыз аныҳәатә усмҩаԥгатә мҩаԥысит. Ацаха ҟаԥшь ԥырҟеит Аҳәынҭқарра Ахада Бадра Гәынбеи Аԥсны инхо аерманцәа Рхеилак ахантәаҩы Алик Миносиани.
Амемориалтә комплекс абас ала ишьақәгылоуп: 1941-1945 шш. рзы Аџьынџьтәылатәи еибашьра Дуӡӡа аҿы иҭахаз аибашьцәа рбаҟа, 1992-1993шш. рзы Аԥсны жәлар Рџьынџьтәылатәи еибашьра аҿы иҭахаз аибашьцәа рбаҟа, иԥсабаратәу аҳаскьын зқәыиааны иҟоу ашьапылампыл маҷ адәы, ахәыҷтәы плошьадкеи ахәыҷқәеи адуцәеи рзы атренажиорқәа ахьышьақәыргылоу аспорттә плошьадкеи.
Акомплекс убасҵәҟьа воркаут, анеиааиратә зона, аӡрыжәтә ӡыршә, ашьышьмаҭра, уҳәа рыла еибыҭоуп. Араҟа ауаҩы иҟазааразы зегьы рыла иманшәалоуп. Акомплекс Аԥсны иқәынхо аерманцәа Рхеилак аԥаратә хархәагақәа рыла иргылахеит, убри аан ихатә ԥарала адгылара ҟаиҵеит Аиҿкаара ахантәаҩы Алик Арутиун-иԥа Миносиан.
Акомплекс аргылара иалагеит шықәсыбжак раԥхьа. Уи аартра Аџьынџьтәылатәи еибашьра Дуӡӡа аҿы Аиааира агара Амш 80-шықәса ахыҵра иадҳәалахеит.
Акомплекс аргылара ирылшоз ала рлагала аларҵеит иара убас Аҟәа араион ауааԥсырагьы.
