Аиԥылараҟны ирзааҭгылеит Ҭырқәтәыла инхо аԥсуаа атәылауаҩшәҟәқәа рыла реиқәыршәара азҵаара, Аҟәатәи аҳаиртә баӷәаза аартра, Аԥсны аҭаара иадҳәалоу ауадаҩрақәа, аҳаирплан абилеҭ ахә ацлара уҳәа реиԥш иҟоу азҵаарақәа жәпакы.

Аԥсуа диаспора аделегациа алацәажәеит Ҭырқәтәыла изықәшәо ауадаҩрақәа  ртәы. "Аҵыхәтәантәи аамҭазы  ҳџьынџьуаа акыр ауадаҩрақәа рԥылоит аҳаиртә мҩа ахәԥсазы. Иаалырҟьаны абилеҭқәа рыхә халеит. Аԥсуа тәылауаҩшәҟәы змоу визада даарц илшоит. Аԥсуа тәылауаҩшәҟәы змам, авиза иоуроуп, уи ауадаҩрақәа цәырнагоит. Шаҟа шықәса ҵуазеи Аԥсни Ҭырқәтәылеи рыбжьара апассаџьырцәа рзы  амшынтә мҩа аартра иалацәажәоижьҭеи, аха рыцҳарас иҟалаз, ари аҵак ду змоу азҵаара аӡбара залыршамхеит", -  ҳәа иҳәеит Ҭырқәтәыла иҟоу Аԥсны ахаҭарнак Ибрагим  Аҩӡба.   

Иара убас иалацәажәеит аҳәынҭқарратә дача "Пицунда" азҵаара.  Аҳәынҭқарра Ахада хәҭа-хәҭала иҟоу аҭагылазаашьа атәы иҳәеит, ҷыдалагьы иаҵшьны иазгәеиҭеит адгьыл аҭира азҵаара шықәгылам. "Аиқәшаҳаҭраҟны ихадараны иҟоу ари адгьылҵакыраҟны иқәгылоу ахыбрақәеи аргыларақәеи роуп", -  ҳәа иҳәеит Аҳәынҭқарра Ахада. Адиаспора ахаҭарнакцәа рганахьала Аҳәынҭқарра Ахада Аслан Бжьаниа имҩаԥиго аполитикатә хырхарҭа ишадгыло атәы рҳәеит, Урыстәылатәи Афедерациа аҳәынҭқарратә дача амазаратә комплекс  Пицунда ахатәтәразы аҭара иазку  Аԥсны  Аҳәынҭқарра  Аиҳабыреи  Урыстәылатәи Афедерациа Аиҳабыреи рыбжьара  Аиқәшаҳаҭра ашьақәырӷәӷәара азҵаарагьы налаҵаны.  Аԥсуафед уамашәа ирбеит ари азҵаара инамыцхәны аполитика ахьалху, ԥасатәи Аҳәынҭқарра  Ахада Сергеи Багаԥшь ихаангьы  Ҭырқәтәыла иҟоу ҳџьынџьуаа "Аԥсны рҭиирц рҭахуп" ҳәа агәра ддыргарц ишаҿызгьы ргәаларшәаны иалацәажәеит.

Асасцәа Аҳәынҭқарра  Ахада иҭабуп ҳәа иарҳәеит ҳаҭыр рықәҵаны иахьидикылаз азы, иара убас Ҭырқәтәылаҟа ааԥхьара иҭаны, ирҳәеит ддырҭаауеит ҳәа агәыӷра шрымоугьы.