«Ҳара имҩаԥаҳго акциа аԥшьызгаз ауаажәларратә еиҿкаара – Агуманитартә Программақәа Рцентр ауп. Есышықәса, амш зеиԥшразаалакгьы, ҳара Ахьӡ-Аԥша апарк аҿы ҳааиуеит ацәашьқәа аҳаркырц азы. Ҳара имҩаԥааго акциа ари апафостә усмҩаԥгатәӡам, ҳара арахь аӡәгьы ааԥхьара иаҳамҭаӡацт, убри азы акәхап уи бжеиҳан алаҳәарада изаанхозгьы.
Уажәы ҳара акциа амҩаԥгара азы заанаҵы адырра ҟаҳҵо ҳалагеит. Уи алахәхаразы агәазыҳәара змоу зегьы ихы алаирхәыр алшоит. Араҟа иахьа иҟоуп ақалақь ауааԥсыра рыдагьы имаҷымкәа ақалақь иаҭаауа асасцәагьы, урҭ ааины иҳазҵаауеит ари аусмҩаԥгатә зызкузеи ҳәа. Ари акциа емоциалеи гәалашәареи рыла игәылҭәаауп», - ҳәа илҳәеит Арда Инал-иԥа.
