Аҟәа. Цәыббрамза 27, 2022 шықәса. Аԥсныпресс. Иахьа, Аԥсны Аҳәынҭқарра аҳҭнықалақь Аҟәа Қырҭтәыла аҳәынҭсовет архәҭақәа рҟынтәи ахақәиҭтәра амш 29 - шықәса ахыҵуеит. Аҟәа ахақәиҭтәразы 12 мшы имҩаԥысуаз ажәыларатә операциа напхгара арҭон Аԥсны атәылахьчара аминистр, аинрал-маиор Сулҭан Сосналиеви Аԥсны Аҳәынҭқарра Арбџьармчқәа ркомандаҟаҵаҩ Хада Сергеи Дбари.
Ҳаибашьцәа гәымшәақәа ирываршьааз акыр ишырацәазгьы ирылшеит 12-нызықьҩык рҟынӡа инаӡоз аӷа хәымга ирхәҭақәа шьҭахьҟа рынаскьагара. Аҵыхәтәаны, ҽынла, цәыббрамза 27, 1993 шықәса рзы ҳаҳҭнықалақь агәаҿы игылаз Аминистрцәа Реилазаара ахыбра иахашәыршәырит Аԥсны Аҳәынҭқарра абираҟ. Ҳаԥсадгьыл аҳҭнықалақь ахы иақәиҭтәын. Араҟоуп иахьыҵхыз Аиааира ашьаҭа! Иаанхаз хымш рыла аӷа шьҭахьҟа, Егры аӡиас ала инагоу аҳәынҭқарратә ҳәаа ахь дыԥхаҵан. Цәыббрамза 30 рзы Қырҭтәылеи Аԥсни ирыбжьоу аҳәынҭқарратә ҳәаа аҿы ишьақәыргылан Аԥсны абираҟ.
Иахьа ашьжьымҭан, Аҟәа ақалақь Ахьӡ-Аԥша апарк аҿы 1992-1993 шш. Аԥсны Аџьынџььтәылатәи еибашьра аҿы иҭахаз афырхацәа рмемориал амҵан ашәҭ шьыҵәрақәа шьҭарҵоит. Арахь иаауеит Аԥсны Аџьынџьтәылатәи еибашьра аветеранцәа, иҭахаз аибашьцәа ранацәа, атәыла Анапхгара ахаҭарнакцәа.
Аҟәа ахақәиҭтәра Амш аҽны аҳҭнықалақь аҿы имҩаԥгахоит аныҳәатә гәалашәаратә усмҩаԥгатәқәа жәпакы. Убас:
Асааҭ 10:00 рзы Ахәыҷтәы-қәыԥштә спорттә школ №1 аҿы амилаҭтә спорт хкқәа рыла аицлабрақәа ирылагоит;
Асааҭ 12:00 рзы Р.Гәымба ихьӡ зху Аԥснытәи аҳәынҭқарратә филармониа аҿы иалагоит аныҳәатә усмҩаԥгатә «Сықалақь Аҟәа»;
Асааҭ 13:00 рзы Ацәыргақәҵатә зал Хада аҟны 1992-1993шш. Аԥсны Аџьынџьтәылатәи еибашьра аҿы Аиааира агара иазкны аԥснытәи асахьаҭыхыҩцәа русумҭақәа рцәыргақәҵа «Ҭагалантәи ацәыргақәҵа» мҩаԥысуеит;
Асааҭ 13:00 рзы Амҳаџьыраа Рыԥшаҳәа аҿы Идырым асолдаҭ ибаҟа аҿаԥхьа иалагоит аԥсуа жәлар рыхәмаррақәа рзы аҷкәынцәа рыбжьара Аҟәа ақалақь Иаарту атурнир «Ахьышьҭра»;
Асааҭ 14:00 рзы С.Ҷанба ихьӡ зху Аԥснытәи аҳәынҭқарратә драматә театр аҟны иаатуеит ашашкақәа, ашахматқәа, домино, астолтә ԥкьаҭмпыл азы Иаарту атурнир;
Асааҭ 16:00 рзы Амҳаџьараа Рыԥшаҳәа аҿы игылаз, аха аибашьраан иблыз Аԥсуаҭҵааратә Институт ԥыхьатәи ахыбра ахьгылаз аплошьадка аҿы иалагоит хыцла ахысыҩцәа рыклуб «Аеҵәа кыдызԥааз» аицлабрақәа;
Асааҭ 19:00 рзы С. Багаԥшь ихьӡ зху аплошьад аҿы адәаҟны иҟоу акинотеатр аҿы ахәаԥшцәа идырбахоит афильмқәа «Ҳара ҳаруаа реиҳабы»,
Асааҭ 19:00 рзы ареспублика аҿы аус зуа инапхгаратәым аиҿкаарақәа рхаҭарнакцәа Аҟәа ақалақь Ахьӡ-Аԥша апарк аҿы анышә иамадоу аибашьцәа рҳаҭгәынқәа рҿы агәалашәаратә цәашьқәа адыркуеит. *** ***
Источник: https://apsnypress.info/ru/novosti/item/1424-segodnya-ispolnilos-29-let-so-dnya-osvobozhdeniya-sukhuma-ot-vojsk-gossoveta-gruzii
© АПСНЫПРЕСС.
