Иара убас амилициа аусзуҩцәа алхратә комиссиа алахәылацәа алхратә докуменнтациа Аԥсны Алхратә комиссиа Хада ахь ианиаргало ирыцзаауеит. Иааизакны алхратә ҭыԥқәа рҿы ауаажәларратә ҭышәынтәалара иалахәуп 900-ҩык инареиҳаны амилициа аусзуҩцәа.

Иара убас аштатнҭыҵтәи аҭагылазаашьақәа шьақәгылар амилициа аусзуҩцәа рҟынтәи арезерв аԥҵоуп.

«Алхратә ҭыԥқәа рҿы аус зуа амилициа ахатәы еилазаара ахыдҵа хадақәа иреиуоуп:

– ауаажәларратә ҭышәынтәалареи ашәарҭадареи рышьықәыргылара;

– атәылауаа рыла алхрақәа рҿы ишьақәыргылоу аԥҟарақәа рынагӡара аганахьала алхратә комиссиақәа ацхыраара рыҭара;

– иҟалар зылшо ауаажәларратә ҭышәынтәалара аилагареи алхрақәа реиԥҟьареи алхратә комиссиа аусура аиҵархареи иазырхоу егьырҭ азинеилагарақәеи раан зыԥшра ҟамҵаӡакәа азхьаԥшреи аԥхьырҟәҟәаареи алыршара», – ҳәа инаҵшьны иазгәеиҭеит Беслан Ҷкадуа.

Атәылауаа, мамзаргьы алхратә комиссиақәа рнапхгаҩцәа рҟынтәи изеиԥшразаалак агәынамӡареи азашшрақәеи ҳмоуӡацт. Атәыла аҩныҵҟатәи аусқәа русбарҭақәа рахь уи азы арзаҳалқәа мааиӡацт.

«Алхратә процесс ҭышәынтәаланы имҩаԥысуеит, алхратә ҭыԥқәа рҿы ҭынчроуп, азакәан еилагарақәа ҳәа акагь арбаӡам», – ҳәа инаҵшьны иазгәеиҭеит Беслан Ҷкадуа.