Чазов ихьӡ зху Акардиологиатә центр ахь агәы-да чымазарақәа змоу, иаарласны иԥҟатәу ҩыџьа ачымазцәа ԥыруеит. Аҽаӡәы – ацламҳәа-хаҿытә федералтә центр ахь амҩа дықәлоит. «Ачымазцәа мҩаԥигоит Чазов ихьӡ зху ацентр аҟынтәи аҳақьым. Амҩан ачымазцәа рзы ихымԥадатәиу зегьы рыцуп. Москватәи аҳаирбаӷәаза Внуково аҿы ачымазцәа ирԥылоит Урыстәыла Амашәырцәгьақәа рмедицинатә Центр аҟынтәи ацхыраара лас амашьынақәа. Аҳаирбаӷәазантәи урҭ зтехнологиатә ҩаӡара ҳараку амедицинатә цхыраара рыҭаразы апрофильтә хәышәтәырҭақәа рахь иргоит», – ҳәа иҳәеит Аԥсны агәабзиарахьчара аминистр инапынҵақәа назыгӡо Едуард Быҭәба.  

Едуард Быҭәба иҭабуп ҳәа иеиҳәеит Урыстәыла Агәабзиарахьчара аминистр Михаил Мурашко.

 Уи иҟаиҵаз адҵа ала (Урыстәылатәи Афедерациа агәабзиарахьчара аминистр – аред АП азгәаҭа) ааигәа Аԥсныҟа дааны дыҟан академик Чазов ихьӡ зху Ацентр адиректор, академик Сергеи Боицов. Сергеи Боицов Ареспубликатә хәышәтәырҭеи ақалақьтә хәышәтәырҭеи дырҭааны игәеиҭеит, уаҟа ишьҭоу апациентцәа дрыҿцәажәеит, дрыхәаԥшит. Уи аамышьҭахь ачымазцәа рҟынтәи еиҳа зҭагылазаашьа уашәшәыроу гәыԥҩык дара рхаҭақәа ақәыршаҳаҭны Урыстәылатәи Афедерациа афедералтә центрқәа рахь рдәықәҵаразы аӡбамҭа рыдыркылеит. Иахьа дара В.Г.Арӡынба ихьӡ зху Жәларбжьаратәи аҳаирбаӷәаза «Аҟәа» аҟынтәи Москваҟа амҩа иқәлоит», - ҳәа иҳәеит Едуард Быҭәба.