«Иарбоу ақәҵарала ҳара афымцамч ахархәареи акриптовалиута арҳаразы ахархәагақәа атәыла ралагалареи рзы ишьақәыргылаз аԥкрақәа рыҽҳәара иацаҳҵоит. Аԥсны акриптовалиута официалла арҳаразы аусура иазхиам», - ҳәа Аминистрцәа реилазаара аилатәараҿы дықәгыло иҳәеит Аԥсны аенергетикеи атранспорти рминистр инапынҵақәа назыгӡо Џьансыхә Нанба.
Ԥхынҷкәынмза 16, 2024 шықәса рзы имҩаԥысыз изаамҭанытәиим Апарламент асессиа аилатәара аҿы актәи аԥхьарала «Акриптовалиута амаининг азинҟамҵара азы» азакәан апроект рыдыркылеит.
Актәи аԥхьараҿы иара убас «Акриптовалиута амаининг амҩаԥгара аусхкы аганахьала Аԥсны азакәанԥҵаратә шәҟәынҵақәакгьы аиҭакрақәа ралагаларазы» акриптовалиута арҳаразы ашьауӷатә ҭакԥхықәра аҵагылара азԥхьагәазҭо азакәан апроект рыдыркылеит.
