Аҩныҵҟатәи аусқәа рминистр Роберт Киут амаининг аҿагылара азы аоперативтә штаб аусура ианалага инаркны аҩныҵҟатәи аусқәа Рминистрра аусзуҩцәа рыла иԥшааны ауааԥсыра ирымырхит 234 цыра амаининг-аппаратқәа ҳәа аилатәара иалахәыз адырра риҭеит.
«Аоперативтә штаб аусура алагара инаркны аҩныҵҟатәи аусқәа Рминистрра аусзуҩцәа иаарԥшны ирымырхит 234 цыра амаининг-аппаратқәа, иара убас 151 обиект ргәаҭара мҩаԥнагеит. Аусурақәа ирыцҵахоит. Есыҽны апрофильтә ҟәшеиҵақәа рҿы аилацәажәарақәа мҩаԥысуеит. Иқәыгылоу ахыдҵақәа ишахәҭоу ала анагӡаразы аусура Аҳәынҭқарратә шәарҭадара Амаҵзура, Аенергохылаԥшра, Аҳәынҭстандарт алархәны имҩаԥысуеит», - ҳәа иҳәеит иара.
АУН «Амшынеиқәафымцамч» адиректор Хада Ҭемыр Џьынџьал Џьвартәи аӡеизакырҭа аҿы аӡы аҩаӡара маҷ-маҷ ахалара иаҿуп ҳәа иазгәеиҭеит.
«Иахьатәи амш азы уи 411,35 рҟынӡа инаӡахьеит. Аха ус ишыҟоугьы уи макьаназы ҳҭагылазаашьа аиӷьтәразы иахәаӡом», - ҳәа иҳәеит иара.
Изакәанымкәа акриптовалиута арҳара азы афактқәа рыла 30 материал аӡбарҭахь идәықәҵоуп, даҽа 24 материал аиқәыршәара иаҿуп, ҳәа адырра ҟаиҵеит аштаб аилатәара иалахәыз Аҳәынҭстандарт анапхгаҩы Нарсоу Сангәлиа. Уи иажәақәа рыла, ирымырхыз амаининг-аппаратқәа рзы ашьҭаҵарҭа ҭәуп, аҭыԥгьы маҷны иаанханы иҟоуп
Аԥыза-министр инапынҵақәа назыгӡо Валери Бганба АУН «Амшынеиқәафымцамч» ахаҭарнакцәа афымцамч аашьҭра ацҵара аганахьала қырҭтәылатәи аган аҿцәажәарақәа мҩаԥыргарц азы анапынҵақәа риҭеит.
Еизаз аӡынтәи афымцамч аашьҭра ацҵара уи азы астанциа алшарақәа аназхо аԥхынтәи афымцамч аашьҭра ала ахарҭәааразы авариант иахәаԥшит.
Иара убас афымцамч аекономиа аҟаҵара азы уахынла, асааҭ 12 рынахыс ареспубликатә трасса аҿы арлашара арцәаразы аӡбамҭа рыдыркылеит.
