Аҟәа. Абҵарамза 28, 2024 шықәса. Аԥсныпресс. Денис Ҵәыџьба Аԥсны Иреиҳаӡоу аӡбарҭа аӡбаҩыс дҟаҵоуп.
Уи азы ақәҵара рыдыркылеит Жәлар Реизара-Апарламент адепутатцәа. Денис Ҵәыџьба Иреиҳаӡоу аӡбарҭа аӡбаҩ имаҵураҭыԥ аҿы иаҭара азы рыбжьы арҭеит 30-ҩык адепутатцәа.
Ҵәыџьба Денис Владимир-иԥа диит 1982 шықәса рзы.
2000 шықәсазы Денис Ҵәыџьба далгеит Ҷлоутәи абжьаратәи ашкол.
2005 шықәсазы далгеит Аԥснытәи аҳәынҭқарратә Университет азиндырратә факультет «Азиндырра» азанааҭ ала.
2005 шықәса инаркны 2006 шықәсанӡа Ареспублика Аԥсны атәылахьчара Аминистрра Мрагыларатәи арратә Гәыԥ аҿы ирратә уалԥшьа наигӡон.
Цәыббрамза 19, 2006 шықәсазы - Очамчыра араион апрокурор ицхырааҩ асҭажиорс дҟаҵан.
Жәабранмза 20, 2007 шықәса рзы - Очамчыра араион апрокуратура аусеилыргаҩ имаҵураҭыԥ ахь стажорс дҟаҵан.
Цәыббрамза 24, 2007 шықәса рзы – Очамчыра араион апрокуратура аусеилыргаҩыс дҟаҵан.
Хәажәкырамза 5, 2009 шықәса рзы - Очамчыра араион апрокурор ицхырааҩыс дҟаҵан.
Жьҭаарамза 7, 2010 шықәса рзы иара хаҭала иалеиҵаз арзаҳал инақәыршәаны, даҽа усураҭыԥ ахь ииасра инамаданы, Ареспублика Аԥсны апрокуратура аусбарҭақәа рҟынтәи ихы дақәиҭтәуп.
Ԥхынҷкәынмза 3, 2010 шықәса инаркны – Очамчыра араион аҩныҵҟатәи аусқәа Русбарҭа аиҳабы ихаҭыԥуаҩ, аусеилыргаратә гәыԥ анапхгаҩыс аус иуан.
Абҵарамза 19, 2014 шықәса инаркны – Очамчыра араион аҩныҵҟатәи аусқәа Рыҟәша аиҳабы инапынҵақәа наигӡон.
Ԥхынҷкәынмза 25, 2014 шықәса инаркны - Очамчыра араион аҩныҵҟатәи аусқәа Рыҟәша аиҳабыс аус иуан.
Нанҳәамза 26, 2016 шықәса инаркны – Ареспублика Аԥсны аҩныҵҟатәи аусқәа Рминистрра аекономикатә цәгьоурақәа рҿагыларазы Аусбарҭа аиҳабыс аус иуан.
Жәабранмза 6, 2019 шықәса рзы Ареспублика Аԥсны аҩныҵҟатәи аусқәа Рминистрра акадрқәа дахыԥхьаӡалоуп.
Рашәарамза 3, 2019 шықәса инаркны – Ареспублика Аԥсны аҩныҵҟатәи аусқәа Рминистрра азинтә еиқәыршәара Аусбарҭа аиҳабы ихаҭыԥуаҩыс аус иуан.
2020 шықәсазы далгеит Урыстәылатәи Афедерациа аҩныҵҟатәи аусқәа Рминистрра иатәу анапхгараҭара Академиа. Ианашьахеит «магистр» ҳәа аквалификациа.
Рашәарамза 30, 2021 шықәса инаркны иахьа уажәраанӡа Аусеицуратә аҩныҵҟатәи аусқәа Рыҟәша аинформациа-координациатә Центр аҿы аус иуан. Иара «Амилициа аполковник» ҳәа ахьӡ ианашьоуп.
