Лео Шервашиӡе Аԥсны асахьаҭыхратә ҟазара аҿиара аус аҿы убасҵәҟьа илагала дууп. Иара ирҿиаратә усура акритикцәа реиԥш, аҟазара абзиабаҩцәагьы даара ҳаҭыр ақәырҵоит.
Аԥсны асахьаҭыхыҩцәа Реидгыла иатәу ацәыргақәҵатә зал Хада адиректор Ельвира Арсалиа «Аԥсныпресс» аинтервиу аҭо Леонид Шервашиӡе абаҩхатәра ду злаз асахьаҭыхҩы иаҳасабала мацара акәымкәа, зхылҵышьра акыр ибзиоу ауаҩы иаҳасабала дихцәажәеит. «Шервашиӡе рыжәла иатәу аӡәырҩы ҳҭоурых аҿы акультуреи аҟазареи ӷәӷәала иазааигәоу, иналукааша ауаа раҳасабала иарбоуп», – ҳәа иазгәалҭоит Ельвира Арсалиа.
Ельвира Арсалиа лажәақәа рыла, Чачба-Шервашиӡе ажәла иналукааша ҩыџьа ахаҭарнакцәа – Алеқсандр Константин-иԥеи Леонид Алеқсеи-иԥеи рбиографиақәа рҿы еиԥшу ахҭысқәа рыҭҵаара ҷыдала аинтерес аҵоуп. Уи лажәақәа рыла, урҭ рбиографиақәа рыҭҵаара ҷыдала аинтересс аҵоуп, аҟазареи акультуратә традициақәеи рыҿиара аҿы урҭ рлагала ду аанарԥшуеит.
Ельвира Арсалиа Лео Шервашиӡе ибиографиа адаҟьақәак дырзааҭгылеит. «Иара диит Париж ақалақь, Моцарт имҩа аҿы. Убри акәзаргьы ҟалап иара анаҩс аҟазара ихы азцо, уи ахь иоуз азҿлымҳара зыдҳәлоугьы.Асахьаҭыхразы раԥхьатәи аурокқәа иара уааҵәҟьа, Париж ауп иахьиоуз. Хыҵхырҭақәак иаадырԥшуа адыррақәа рыла, Леонид Алеқсеи-иԥа еицырдыруа аҟазарадырҩцәа А. Бухови В. Контариови рҿы аҵара иҵон. Аха, Контариов даниабадыруаз аамҭазы Леонид Шервашиӡе ишьақәгылахьоу асахьаркыратә стиль иоухьан, иуникалу апочерк иман. Урҭ еиҳа иколлегацәаны, еиҩызцәаны иҟан», – ҳәа еиҭалҳәеит Ельвира Арсалиа.
Ельвира Арсалиа Леонид Шервашиӡе раԥхьатәи аԥсуа сахьаҭыхыҩцәа раҳасабала далылкаауеит: «Георги Гәлиеи Назим Ҳалуашьи дрыцны иара профессионалла аус иуа далагеит 1930-тәи ашықәсқәа ралагамҭазы, усҟан Аԥсны инагӡаны асахьаҭыхратә ҵарадырра шьақәымгылаӡацызт. Леонид Шервашиӡе акыр зҵазкуа раԥхьатәи иусумҭақәа иреиуоуп аҵарауаа В. Кәыкбеи А. Хашбеи рредакциа ала 1930-тәи ашықәсқәа ралагамҭазы икьыԥхьыз «Аԥсуа нбан», иара убас 1935 шықәсазы иҭыжьыз аԥсуа лакәқәа реизгеи рзы аиллиустрациақәа. Уажәы уи аҭыжьымҭа шамахамзар иуԥымло абиблиографиатә ҭыжьымҭаны иҟоуп, иҟалар алшоит уи аукционқәеи, мамзаргьы ахатә коллекциақәак рҿы иуԥылар.
Леонид Шервашиӡе иара убас аиллиустрациала еиқәиршәеит А. Фадеев ишәҟәы «Аԥсны аҭоурых азы аочеркқәа» («Очерки истории Абхазии»), – ҳәа илҳәеит лара.
Ҷыдала аинтересс аҵоуп нарҭтәи аепос иазку Лео Чачба иусумҭақәа рсериа. Ельвира Арсалиа лажәақәа рыла, иара ари атема зырҿиамҭаҿы иазааҭгылаз раԥхьатәи асахьаҭыхыҩцәа дреиуоуп. «Иара инапы иҵыҵыз аиллиустрациақәа аетнографиатә материал иҵауланы аилкаара аныԥшуеит, иара убри ала урҭ аиллиустрациа аҳасабала адагьы хаз игоу аҟазара арҿиамҭа аҳасабалагьы ахә ҳаракхоит, акыр зҵазкуа аҟазшьа аанахәоит», – ҳәа лгәаанагара лҳәеит Ельвира Арсалиа.
Леонид Шервашиӡее аҵарауаҩык иаҳасабала илагала Аԥсны еиԥш уи анҵыгьы иазхарҵон, ҳаҭыргьы ақәырҵон. «Иусмҭақәа рӷьырак иара инапала иҟаҵоу зеиӷьаҟам аиллиустрациақәа рыла еиқәыршәоуп. Ҿырԥштәыс иаагозар, аладатәи Аԥсны ажәытәӡатәи аныхабаақәа рҭоурых иазку ашәҟәы. Араҟа иубар алшоит иара инапала иҟаиҵаз ауахәамақәеи аныхабаақәеи рзы апланқәеи афрескақәеи рҭыхымҭақәа. Даҽа иналукааша аусумҭа – Аҟәа иазку ашәҟәы «Ацәқәырԥақәа иатәнатәыз ақылақь иазку аповесть» («Повесть о городе, взятом волнами»). Араҟа Леонид Шервашиӡе, археолог, аҵарауаҩ иаҳасабала, зеилкаара мариоу абызшәа ала иуадаҩу, аха акыр аинтересс зҵоу аԥшаарақәа, иара убас Аҟәатәи абаӷәаза иахьаҵанакуа аӡаҵаҟа иҟоу ажәытәӡатәи антикатә қалақьқәа иреиуоу, ажәытә бырзенцәа «ихьӡырҳәагоу Диоскуриа» ҳәа изышьҭаз, римлианаа ракәзар – Себастополис ҳәа изышьҭаз ақалақь аҿы архиологиатә ҭҵаарақәа ртәы еиҭеиҳәон. Ари ашәҟәы иамоу аиллиустрациақәа рыла: археолог Лев Соловиов ипортрет азы асахьеинырсла, шамахамзар џьара уаҳа иуԥымло аԥшаахқәа рсахьақәа, уажәы Аԥснытәи аҳәынҭқарратә музеи аҿы иҟоу ажәытәбырзентә стела асахьа, уҳәа рыла иалукаауеит», - ҳәа еиҭалҳәеит Ельвира Арсалиа.
Леонид Шервашиӡе ганрацәалатәи аҟыбаҩ злаз уаҩын: анаукатәии асахьаҭыхратә усуреи рнаҩс иара акыр дазҿлымҳан агеральдика. «Лео Шервашиӡе аԥснытәи аҭауадцәеи аамсҭацәеи рыжәлатә гербқәа реиқәыршәара, иара убас уаанӡа иҟаз реиҭашьақәыргылара инапы алакын. Иара ибзоурала иаԥҵан аматрикул – аамсҭажәлақәа рофициалтә сиа.
Лео Шервашиӡе икалам иҵыҵит иара убас ашәҟәы «Аԥсуа ҭауадцәеи аамсҭацәеи рыжәлатә гербқәа» («Фамильные гербы абхазских князей и дворян»), – ҳәа еиҭалҳәеит Ельвира Арсалиа.
Леонид Шервашиӡе имаҷымкәа иаамҭа арҵаҩратә усура иазикит. Аҟәатәи арҵаҩратә Институт аҿы, Аԥснытәи Аҳәынҭқарратә Университет аҿы антикатә литература аҭоурыхи аҟазара аҭоурыхи рзы иара илекциақәа ирзыӡырҩуаз зегьы гәхәара дула урҭ ргәаладыршәоит.
Леонид Шервашиӡе иҭаацәара аҿы атрадициақәа ирыцицеит уи иԥа – еицырдыруа асахьаҭыхҩы, атеатри акинои рықәыргылаҩ, аекспозициақәа реиқәыршәаҩ, Урыстәылатәи асахьаҭыхратә Академиа академик Алеқсеи Шервашиӡе.
